काठमाडौं । भारतीय चलचित्र ‘आदिपुरुष’ रिलिज भएदेखि नै निकै विवादमा परेको छ । नेपालसहित भारतका विभिन्न हलमा हिन्दू संगठनवादीहरुले यो चलचित्रको विरोध गर्दै प्रदर्शनमा रोक लगाएका छन् ।
‘आदिपुरुष’मा ‘जानकी भारतकी छोरी’ भन्ने शब्द समावेश गरिएपछि काठमाडौँ महानगरले उक्त शब्द फिल्मबाट हटाउन तीन दिनको समय दिएको थियो । तर, नेपालमा मात्र हटाएपछि महानगरले सोमबारबाट प्रदर्शनमा रोक लगाएको थियो ।
फिल्मको संवाददेखि लिएर कलाकारहरूको अभिनयलाई लिएर मानिसहरूले निकै विरोध गरिरहेका छन् । साउथका सुपरस्टार प्रभास र बलिउड अभिनेत्री कृति सेनन फिल्ममा मुख्य भूमिकामा छन् ।
अब बिस्तारै यो विरोधको प्रभाव फिल्मको कमाइमा देखिन थालेको छ । पहिलो तीन दिनमा बक्स अफिसमा धमाकादार कमाई गरेको यो फिल्म चौथो दिनदेखि घट्दै गएको छ ।
‘आदिपुरुष’ को पाँचौँ दिनको कमाइमा भारी गिरावट आएको छ । ‘आदिपुरुष’ ले पाँचौँ दिन भारतको बक्स अफिसमा १० करोड रुपैयाँ कमाएको छ ।
‘आदिपुरुष’ ले चौथो दिन १६.५० करोड कमाएको थियो । फिल्मको कमाइमा आएको यो गिरावट देखेपछि निर्मातासँगै फ्यानहरू पनि चिन्तित भएका छन् ।
हालसम्म फिल्मले भारतभरबाट २ सय ४८ करोड भारतीय रुपैयाँ कमाएको छ । हिन्दुस्तान टाइम्सका अनुसार आलोचनाको बाबजुद रिलिज भएको पाँच दिनमा विश्वभरबाट फिल्मले ३ सय ९५ करोड कमाएको छ ।
यो फिल्म बनाउनका लागि निर्माताले ५ सय करोड खर्च गरेका छन् । तर अहिलेसम्म फिल्मले बजेट फिर्ता लिन सकेको छैन ।
