सुन प्रकरणमा नेताको नाम जोडिएपछि प्रचण्डको रटान- कुनै पनि हालतमा छाडिन्न

हाम्रा कुरा

प्रकाशित २०८० साउन २२ सोमबार

काठमाडौं । सुन तस्करी प्रकरणमा माओवादी केन्द्रका नेताहरूको नाम जोडिएपछि नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल ‘प्रचण्ड’ले नछाड्ने बताएका छन् । यही साउन १७ देखि राजधानीमा चलेको केन्द्रीय समिति बैठकको समापनका क्रममा उनले यस्तो बताएका हुन् ।

‘प्रचण्ड’ले आफ्नै पार्टीका नेता भए पनि भ्रष्टाचार र अनियमिततामा संलग्नलाई कुनै पनि हालतमा नछाडिने उद्घोष गरेका छन् । भ्रष्टाचार विरोधी अभियानमा आफ्ना र अरू नभनी दोषी ठहरिएकालाई कडा कारबाही गरिने बताए ।

पार्टीका उपाध्यक्ष कृष्णबहादुर महराको नाम इलेक्ट्रिक चुरोट ‘भेप’मा लुकाएर ल्याएको सुन तस्करी प्रकरणमा जोडिएको भन्दै बैठकमा नेताहरूले महराप्रति पनि छानबिन हुनुपर्ने बताएका थिए ।

प्रचण्डले भने, “तपाईँलाई म प्रस्टसँग भन्छु, यसमा आफ्ना वा अरू कोही भनिने छैन । आफ्नै टाउकोमा आगो सल्काएर मात्र हामीले यो अभियानलाई निष्कर्षमा पुर्‍याउन सक्छौँ”, प्रधानमन्त्री दाहालले भने, “त्यसैले तपाईँहरू कोही पनि भ्रमित नहुनुहोला । सरकार दृढतापूर्वक अगाडि बढ्छ ।”