चितवन । मौसम परिवर्तनसँगै जिल्लामा बढ्दै गएको डेङ्गी, आँखा पाक्ने रोगलगायतको अवस्था र तथ्याङ्कलाई छिटोछरितो ढङ्गबाट स्वास्थ्य कार्यालयलाई गराउन आग्रह गरिएको छ ।
कार्यालयले आज जिल्लाका सरकारी, निजी र सामुदायिक अस्पताल एवं प्रयोगशालाका प्रमुख एवं प्रतिनिधिलाई बोलाएर सङ्क्रमण बढ्दो अवस्था कार्यालयलाई छिटोछरितो रुपमा सूचना सम्प्रेषण गरिदिन आग्रह गरेको हो ।
जिल्लामा बिहीबार मात्र डेङ्गीका कारण एक जनाको मृत्यु भएको छ । डेङ्गी सङ्क्रमण भएकाको सङ्ख्या ५३ पुगेको छ । आँखा पाक्ने समस्याका कारण जिल्लाका शिक्षण संस्था बन्द रहेका छन् ।
कार्यालयका निमित्त प्रमुख इन्द्रमणि भण्डारीले मलेरिया, डेङ्गी, स्क्रबटाइफस, जापानिज इन्सेफलाइटिस, कोभिडजस्ता रोग फैलनसक्ने समयमा नियमित सूचना दिन आग्रह गरे । नियमित रिपोर्टिङले तथ्याङ्क सङ्कलन र विष्लेषण गर्न सहज हुने उनको भनाइ थियो ।
उनले भने, “सरकारी तथा निजी क्षेत्रबाट प्रभावकारी रिपोर्टिङ नहुँदा महामारी नियन्त्रणमा समस्या हुने गर्छ ।” रोगको नियन्त्रणसँगै रोकथामका लागिसमेत नियमित रिपोर्टिङ आवश्यक रहेको उनको भनाइ थियो ।
अहिले दिइँदै आएको सूचनालाई अझै प्रभावकारी बनाउनसके प्रभावित क्षेत्रको पहिचान र त्यहाँ हुनसक्ने समस्या समाधानमा सरकारको ध्यान पुर्याउन सहज हुने कार्यालयका सूचना अधिकारी राम केसीले बताए ।
अहिले हप्ता/पन्ध्र दिनमा तथ्याङ्क र जानकारी पठाउने गरेकामा अब दैनिकरुपमा पठाउन उनले आग्रह गरे । उनले भने, “समन्वयको कमीका कारण प्रभावितले समयमा उपचार नपाउने समस्या आउन सक्छ ।”
अहिलेको समय किटजन्य रोगको समय भएकाले सबै अस्पताल, प्रयोगशालालाई सतर्कताका साथ तथ्याङ्क समयमा पठाउन उनले आग्रह गरे ।
निजी अस्पताल समन्वय समिति चितवनका सचिव विक्रम अधिकारीले अहिले गरेको रिपोर्टिङलाई नियमितरुपमा व्यवस्थित बनाउँदै लैजाने बताए ।
आगामी भदौ र असोजमा जिल्लामा डेङ्गीको सङ्क्रमण फैलने गरेको जनाउँदै उनले सबैको सहयोगले मात्र नियन्त्रण सम्भव रहेको बताए ।
जिल्लामा हाल उपचारका लागि आएकामध्ये हालसम्म ५३ जनामा डेङ्गीको सङ्क्रमण देखिएको छ । सङ्क्रमितमध्ये एक जनाको मृत्यु भएको छ ।
पाँच सय ३२ जनाको परीघक्षणका क्रममा उनीहरुमा सङ्क्रमण देखिएको हो । सङ्क्रमितमध्ये ठेगाना नखुलेका छ जना र जिल्ला बाहिरका १७ जना रहेको केसीले जानकारी दिए । चितवनका ३० जनामा डेङ्गीको सङ्क्रमण देखिएको उनले बताए । रासस
