काठमाडौँ । इङ्गल्याण्ड महिला विश्वकप फुटबलको सेमिफाइनलमा प्रवेश गरेको छ । शनिबार भएको क्वार्टरफाइनलमा कोलम्बियालाई पराजित गर्दै इङ्गल्याण्ड सेमिफाइनलमा पुगेको हो । १–० ले पछि परेको इङ्गल्याण्डले त्यसपछि लगातार दुई गोल गर्दै खेल २–१ ले जितेको हो ।
खेलको ४४ औँ मिनेटमा कोलम्बियाकी लेसी मारिया सान्तोस हेरेराले गोल गर्दै टोलीलाई अग्रता दिलाइन् । तर पहिलो हाफको इन्जुरी समयमा लाउरेन हेम्पले गोल गर्दै बराबरीमा ल्याइन् । ६३ औँ मिनेटमा एलेसिया रुस्सोले गोल गर्दै इङ्गल्याण्डलाई सेमिफाइनलमा पुर्याइन् ।
योसँगै सेमिफाइनल समीकरण पनि पूरा भएको छ । इङ्गल्याण्डले आयोजक अष्ट्रेलियासँग सेमिफाइनल खेल्नेछ ।
शनिबार नै भएको क्वार्टरफाइनलमा फ्रान्सलाई सडन डेथमा पराजित गर्दै आयोजक अष्ट्रेलियाले सेमिफाइनलमा स्थान बनाएको हो ।
निर्धारित ९० मिनेट र थपिएको ३० मिनेटमा पनि गोल नभएपछि खेल पेनाल्टी सुटआउटमा गएको थियो ।
पेनाल्टीमा ४–४ को बराबरी भएपछि सडन डेथमा खेल धकेलियो । सडन डेथ पनि निकै रोमाञ्चक हुँदा अन्ततः अष्ट्रेलिया ७–६ ले विजयी भयो ।
दुवैतर्फ १० जनाले पेनाल्टी प्रहार गरेका थिए ।
३२ टिमले सहभागीता जनाएको प्रतियोगिताको सेमिफाइनल समीकरण पूरा भएको छ । सेमिफाइनलमा इङ्गल्याण्डले अष्ट्रेलियासँग अगस्त १६ तारिखमा खेल्नेछ ।
पहिलो सेमिफाइनलमा स्पेन र स्वीडेन अगस्त १५ तारिखमा भिड्ने छन् ।
अर्को आयोजक न्यूजिल्याण्ड भने समूह चरणबाटै बाहिरिएको थियो ।
