काठमाडौँ । नेपाली कांग्रेसका नेता डा. शेखर कोइरालाले केन्द्रीय कारागारमा रहेका कांग्रेस केन्द्रीय सदस्य एवं पूर्व गृहमन्त्री बालकृष्ण खाँडलाई भेटेका छन् । कोइरालाले बुधबार नक्कली भुटानी शरणार्थी प्रकरणमा केन्द्रीय कारागारमा पुर्पक्षका लागि थुनामा रहेका खाँडलाई भेटेका हुन् ।
केन्द्रीय कारागार कार्यालयका अनुसार डा. कोइराला बुधबार दिउँसो खाँडलाई भेट्न पुगेका हुन् । उनीहरुबीच एक घण्टा कुराकानी भएको थियो ।
जिल्ला अदालत काठमाडौँले पुर्पक्षका लागि थुनामा पठाउन गरेको आदेशविरुद्ध उच्च अदालत पाटनमा अपील गरेका खाँडलाई थुनछेक बहसका लागि पेसी चढ्ने बेला भएको समयमा डा. कोइरालाले भेट्नुलाई अर्थपूर्ण रूपमा हेरिएको छ ।
उच्च अदालत पाटनमा थुनछेकको बहस बिहीबार मात्रै हुन्छ । स्रोतका अनुसार जिल्ला अदालतको आदेशविरुद्ध उच्चमा गएका यो मुद्दाका प्रतिवादीहरूको मुद्दा बिहीबार पेसी चढ्ने सम्भावना छ ।
त्यसको पूर्वसन्ध्यामा डा. कोइरालाले खाँडलाई भेटेका हुन् । २७ बैशाखमा चाबहिल मैजुवहालस्थित निवासबाट पक्राउ परेका खाँडलाई १ असारमा काठमाडौँ जिल्ला अदालतले पुर्पक्षका लागि थुनामा पठाउन आदेश दिएको थियो ।
त्यसयता उनी थुनामै रहेका छन् । उनीसँगै कांग्रेस नेता आङटावा शेर्पा, एमालेका निलम्बित सचिव एवं सांसद टोपबहादुर रायमाझी पनि केन्द्रीय कारागारमा रहेका छन् ।
