तनहुँ । समुद्री सतहबाट दुई हजार एक सय ३४ मिटर उचाइमा अवस्थित छिम्केश्वरी मन्दिरमा पर्यटकको आकर्षण बढ्दै गएको छ ।
आँबुखैरेनी गाउँपालिका–५ मा रहेको छिम्केश्वरी मन्दिर पर्यटकहरुको पहिलो रोजाइमा पर्ने गरेको हो ।
उक्त मन्दिरबाट धौलागिरि, अन्नपूर्ण, मनास्लु, बुद्ध हिमाल लगायतका प्राकृतिक मनोरम दृश्य अवलोकन गरी आनन्द लिन सकिन्छ ।
आँबुखैरेनीबाट लाब्दीसम्म करिब १८ किमीमध्ये नौ किमी कालोपत्र छ भने अन्य सडक ग्राभेल रहेको छ ।
ग्राभेल सडकपश्चात् सात सय ५० मिटर रेलिङ निर्माण गरिएकाले पैदल हिँड्नुपर्ने हुन्छ ।
धार्मिक पर्यटनको प्रचुर सम्भावना बोकेको यस मन्दिरमा हालै चार सय २५ किलोग्राम पित्तलको पाता प्रयोग गरी मन्दिरको छाना छाइएको गाउँपालिकाका इन्जिनियर पङ्कज मगरले जानकारी दिए ।
प्यागोडाशैलीमा पुनः निर्माण गरिएको उक्त मन्दिरमा छाना, मुकुट, नागोल, झलर र गजुर निर्माण लगायतका कार्यमा पित्तल प्रयोग गरिएको हो ।
गाउँपालिकाको रु २१ लाख ५० हजार चार र बाँकी रकम उपभोक्ता समितिले ब्यहोर्ने गरी कूल रु २३ लाख ९७ हजार दुई सय १८ लागतमा उक्त कार्य गरिएको हो ।
मन्दिरको छानाका लागि मात्रै ज्यालासहित रु १२ लाख खर्च भएको छ ।
मन्दिर परिसरमा मौला निर्माण गर्ने, मन्दिरको भित्री भागमा टायल बिच्छाउने, रङरोगन र टल्काउने लगायतका कार्य गरेर चिटिक्क बनाइएको उनले बताए ।
धार्मिक पर्यटनको प्रचुर सम्भावना रहेकाले यस स्थानको मन्दिर जीर्ण बनेपछि गाउँपालिकाले करिब रु ४५ लाख बजेट विनियोजन गरी पुनर्निर्माण गरेको हो ।
छिम्केश्वरीलाई धार्मिक पर्यटनको केन्द्र बनाउने लक्ष्यसहित गाउँपालिका अगाडि बढेको गाउँपालिकाका प्रमुख प्रशासकीय अधिकृत विष्णुप्रसाद शर्माले जानकारी दिए ।
गोरखा मनकामनाकी दिदीका रुपमा पुजिँदै आएको छिम्केश्वरीमाई मन्दिरमा पूजाआजा गरेपछि मनले चिताएको इच्छा पूरा हुने धार्मिक विश्वास रहँदै आएको छ ।
सात देवीमध्ये जेठी बूढीदेवी माई र माइली छिम्केश्वरी माई छिम्केश्वरी लेकमै अवस्थित छन् भने साइली गोरखाकाली माई, काइली मनकामना माई, अन्तरी इच्छाकामना माई, जन्तरी अन्नपूर्णा माई र कान्छी अकला माईलाई सोहीस्थलबाट दृश्यावलोकनसहित दर्शन गर्न सकिन्छ ।
छिम्केश्वरीको डाँडामा खानेपानीको स्रोत नभएकाले प्लास्टिकको पोखरीमा पानी सङ्कलन गरेर गत वर्षदेखि मन्दिर पुनर्निर्माणको काम सम्पन्न गरिएको छ ।
मन्दिर जीर्ण भएपछि गाउँपालिकाले गत वर्षबाट मन्दिर निर्माणको काम सुरु गरे पनि भौगोलिक विकटताका कारण निर्माण कार्यमा ढिलाइ भएको गाउँपालिकाका अध्यक्ष शुक्र चुमानले जानकारी दिए ।
मन्दिरको भौतिक संरचना परिवर्तन गरी आकर्षण स्थल बनाएसँगै पर्यटकीयस्थलका रुपमा विकास गर्न लागिएको उनले बताए । रासस
