-
-
-
-
धनुषा । जनकपुरधाममा ठेकेदारको लापरबाहीले खुला छाडेको सडकको नालामा खसेर एक बालकको मृत्यु भएको छ । मृत्यु हुनेमा जनकपुरधाम उपमहानगरपालिका वडा नम्बर २५ लोहनाको हजाम टोलका रञ्जित मुखियाका दुई वर्षीय छोरा रोहन हुन् ।
शुक्रबार बिहानै उठेर साढे ६ बजे घर अगाडि खेलिरहेका बालक छेउँको नाला (चेम्बर) मा खसेका थिए । परिवारजनले खोजबिन गरेपछि मुख तल र खुट्टा मात्रै थोरै देखिएको अवस्था भेटिएको स्थानीय शैलेन्द्र मुख्याले बताए ।
चेम्बरबाट निकाल्दा बच्चाको मृत्यु भइसकेको थियो । स्थानीय दुःखी मण्डलका अनुसार मधेस प्रदेश सरकारको बजेटमा दुई वर्षअघि ढलान भएको सडकमा नालाको लागि बनाइएको चेम्बरमा ढक्कन लगाइएको छैन ।
ठेकेदार र उपमहानगरपालिकाकालाई पटक–पटक ढक्कन लगाउन आग्रह गर्दा पनि अहिलेसम्म नलगाइएको र बच्चा त्यसको सिकार भएको स्थानीय मण्डलले बताए ।
बच्चाको मृत्युुले गाउँ शोकमग्न बनेको हो ।
