काठमाडौं । नेपाली काँग्रेसका सांसद एवं केन्द्रीय सदस्य बद्रीप्रसाद पाण्डेले नेपाली काँग्रेस अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीलाई महाअभियोग लगाउने पक्षमा रहेको बताएका छन् ।
उनले हाम्राकुरासंग कुरा गर्दै सांसद पाण्डेले पार्टीले आधिकारिक धारणा सार्वजनिक नगरे पनि पार्टी लोकमानलाई महाअभियोग लगाउने पक्षमै रहेको जिकिर गरे ।
उनले एमाले र माओवादी केन्द्रप्रति भने शंका ब्यक्त गरे । उनी भन्छन्, ‘महाअभियोग लगाउने सम्बन्धमा एमाले र माओवादी शंकाको घेरामा छन्, संसदको एक तिहाइ सांसद भएको पार्टीलाई जानकारी नगराई महाअभियोग दर्ता गर्नु भनेको कतै उनीहरु नै महाअभियोग लागोस् भन्ने नचाहेका हुन् कि भन्ने लागेको छ ।’
पाण्डे भन्छन्, ‘अपत्याशित रुपले महाअभियोग दर्ता गरिंदा पनि एमाले माओवादीप्रति शंका गर्ने ठाउँ छ ।’
पाण्डेले महाअभियोग समितिलाई यो विषयमा गम्भीर भएर छानबीन गर्न पनि आग्रह गरेका छन् । कुनै रहस्य भए त्यसको पनि रहस्योद्घाटन हुनुपर्नेमा सांसद पाण्डेको जोड छ ।
लोकमानलाई ०७० सालमा नियुक्त गर्दा पनि गल्ती भएको भन्दै अहिले पनि उनलाई त्यो पदमा बचाइराख्नु आवश्यक नभएको उनले बताए ।
लोकमानका गतिविधि हेर्दा पनि उनी अख्तियार प्रमुखको पदमा लायक नभएको सांसद पाण्डेको ठहर छ ।
काँग्रेसका युवा नेता पाण्डेले लोकमानको विषयलाई सामान्य रुपमा लिनुपर्ने धारणा राख्छन् ।
संसदको सामान्य प्रक्रिया अन्तर्गत लोकमानको महाअभियोग अगाडि बढिरहेका अवस्थामा बढी हल्लाखल्ला गरेर लोकमानलाई ठूलो बनाउने काम भएको पनि उनले बताए ।
उनी भन्छन्, ‘लोकमानलाई ज्ञानेन्द्र हटाउनु जस्तै गरी ठूलो बनाउन खोजिदै छ यो गलत हो ।’
