उपाध्यायलाई कार्यकारी बनाएपछि स्वास्थ्य बीमाका पाँच जना सदस्यले दिए सामूहिक राजीनामा

हाम्रा कुरा

प्रकाशित २०८० कार्तिक १ बुधबार

काठमाडौं । स्वास्थ्य बीमा बोर्डका पाँच जना सदस्यले सामूहिक राजीनामा दिएका छन् । बोर्ड सदस्य डा सुरेश तिवारी, डा तारा शाह, इन्द्रकला राई, चन्द्र थापा र टिका चापागाईँले सामूहिक राजीनामा दिएका हुन् । नौ महिनादेखि स्वास्थ्य बीमा बोर्ड अध्यक्ष विहीन छ । स्वास्थ्य तथा जनसंख्यामन्त्री मोहनबहादुर बस्नेतले सोमवार स्वास्थ्य मन्त्रालय गुणस्तर मापन तथा नियमन महाशाखाका प्रमुख डा. मदन उपाध्यायलाई स्वास्थ्य बीमा बोर्डको निमित्त कार्यकारी निर्देशक नियुक्त गरेका थिए।

बोर्डमा ९ महिनादेखि अध्यक्ष नियुक्ति नगर्नु र मन्त्रालयकै महाशाखा प्रमुखलाई निमित्त कार्यकारीको जिम्मेवारी दिनु स्वार्थ बाझिने भएकाले राजीनामा दिनुपरेको उनीहरूको भनाइ छ । राजीनामा दिनुभएका बोर्ड सदस्य चन्द्र थापाले स्वास्थ्य मन्त्रालय गुणस्तर नियमन महाशाखा प्रमुख समेत रहेका उपाध्यायलाई बोर्डको कार्यकारी निर्देशक समेतमा नियुक्ति गरिनु कन्फिलिक्ट अफ इन्ट्रेष्ट जोडिएको बताए ।

स्वास्थ्य बीमा वोर्डको अध्यक्ष नियुक्त गर्न नसकिरहेको अवस्थामा कार्यकारी निर्देशकलाई निलम्बन गरेकोमा आपत्ति जनाए । स्वास्थ्य मन्त्रालय स्वास्थ्य सेवा प्रवाह गर्ने निकाय रहेको र बोर्ड गुणस्तरीय सेवा खरिद गरेर जनतालाई वितरण गर्ने निकाय रहको हुँदा बोर्डको प्रमुख कार्यकारी र मन्त्रालयको महाशाखा प्रमुख एउटै व्यक्ति हुँदा स्वास्थ्य बीमा कार्यान्वयनमा बाधा पुग्ने भएका कारण बाध्य भएर राजीनामा दिनुपरेको बताए ।

थापाले भने, ‘स्वास्थ्य सेवाका क्रममा हुने भड्किलो खर्च कम गर्न र गुणस्तरीय सेवामा जनताको सर्वसुलभ पहुँच स्थापित गर्न स्थापित स्वास्थ्य बीमा बोर्डको सदस्यको रूपमा रही नीति, कार्यविधि र कार्यक्रमहरु तयार पारी लागू गर्ने कार्यमा क्षमताले भ्याएसम्म योगदान गरियो । बदलिँदो परिवेश र हाम्रो व्यवहारिक कारणले स्वास्थ्य मन्त्री समक्ष यो सामूहिक राजीनामा दिएका हौँ ।’