काठमाडौँ । विश्वकप फुटबलको एसियाली छनोटमा नेपाल यूएईसँग पराजित भएको छ । बिहीबार यूएईको घरेलु मैदानमा भएको खेलमा नेपाल ४–० ले पराजित भएको हो । चार ओटै गोल मध्यान्तरअघि भएका थिए ।
यूएईको जितमा अलि अहमद मबखोटले दुई तथा खालिफा मुबारक अल्हाम्माडी र फाबियो भर्जिनियो लिमाले एक एक गोल गरेका थिए ।
एसियाली फुटबलको बलियो राष्ट्र यूएईविरुद्ध नेपालले दोस्रो हाफमा उत्कृष्ट प्रर्दशन गर्यो । पहिलो हाफको गल्ती सुधार गर्दै दोस्रो हाफमा यूएईलाई रोक्न नेपाल सफल भयो ।
डिफेन्डर रोहित चन्द र गोलरक्षक किरणले विपक्षीका केही कडा आक्रमणलाई विफल पारेका थिए। खेलको ४७ औं मिनेटमा नेपालका आशिष चौधरीले पहेलो कार्ड ब्यहोरेका थिए।
उनले यूएईका गोलकर्ता फाबियो भर्जिनियो लिमालाई फाउल गरेका थिए । नेपालले खेलको ८१ औं मिनेटमा राम्रो अवसर पाएको थियो। मनिष डाँगीले पेनाल्टी बक्स नजिकैबाट गरेको कडा प्रहार यूएईका गोलरक्षकले मुस्किलले बचाएका थिए ।
यसअघि नेपाल र यूएईबीच सन् १९८४ मा खेल भएको थियो । सन् १९८४ को अक्टोबर २९ मा भएको सो खेलमा नेपाल ११–० गोलले पराजित भएको थियो ।
३९ वर्षको अन्तरमा नेपालले सात गोलको सुधार गरेकाे हो ।
विश्वकप छनोटमा नेपाल समूह एचमा रहेको छ । जसमा नेपाल र यूएईसहित बहराइन र यमन रहेका छन् ।
अब नेपालले आगामी मंगलबार नोभेम्बर २१ मा यमनविरुद्ध घरेलु मैदान दशरथ रंगशालामा खेल्नेछ । होम एण्ड अवेका आधारमा खेलहरु भइरहेका हुन् ।
नेपाली टीम शुक्रबार राति ११ः४५ बजे त्रिभुवन अन्तर्राष्ट्रिय विमानस्थलमा आईपुग्नेछ ।
