गगन–शेखर समूहको बैठकमा राष्ट्रिय सभामा नयाँ अनुहारलाई जोड [फोटोफिचर]
हाम्रा कुरा
प्रकाशित २०८० मंसिर २७ बुधबार
1.1k
Shares
काठमाडौँ । नेपाली कांग्रेसको गगन–शेखर समूहको बैठक बसिरहेको छ । बत्तीसपुतलीस्थित अनुपम फुडल्याण्डमा दिउँसो २ बजेपछि बसेको बैठकमा नेताहरुले विचार राख्ने क्रम जारी रहेको छ ।
विचार राख्ने अधिकांशले आसन्न राष्ट्रिय सभाको निर्वाचनमा नयाँ अनुहार र समाजमा योगदान गरेर पनि अवसर नपाएकालाई मात्र दिनुपर्नेमा जोड दिएका छन् ।
नेताहरु अर्जुननरसिंह केसी, डा. सुनील शर्मा लगायतले राष्ट्रिय सभामा आफ्ना र लगातार आएकालाई नभई नयाँलाई दिनुपर्नेमा जोड दिएका हुन् ।
बोल्ने अधिकांश वक्ताहरुले यही लाइनमा बोलिरहेका छन् । उनीहरुले ‘नयाँ मानिस हुनुपर्छ । चुनाव हारेकालाई लैजानु हुँदैन । पटक पटक अवसर पाएकालाई नदिने र अवसर नै नपाएकालाई दिनुपर्छ’ भनेका छन् ।
साथै बैठकमा कांग्रेसको आसन्न महासमिति बैठकका विषयमा पनि छलफल भइरहेको छ ।
महासमिति बैठकका लागि आगामी शुक्रबार कार्यसम्पादन समितिको बैठक बस्दैछ । कार्यसम्पादनमा पनि कसरी प्रस्तुत हुने भन्नेबारेमा नेताहरु छलफलमा छन् ।
त्यसैगरी संस्थापन पक्षले फेरि पनि महासमिति बैठक सार्ने चर्चा चलिरहँदा गगन–शेखर पक्षले कुनै पनि हालतमा कुनै पनि बहानामा महासमिति सर्न नहुने बताउँदै आएका छन् ।
बैठक नसरे महासमिति बैठक आगामी पुस १६ देखि १९ गतेसम्म गोदावरीमा बस्दैछ । यसअघि भने पटक पटक बैठक सर्दै आएको थियो ।
