पोखरा । जाउँ है पोखरा अभियानकाे टोलीले गण्डकी प्रदेश घुम्नका लागि पाँच वटा प्याकेज सार्वजनिक गरेका छन् । भैरहवामा शनिबार आयोजित एक कार्यक्रमका बीच प्याकेज सार्वजनिक गरिएको हो ।
प्याकेजमा घुमघाम पोखरा, शैक्षिक भ्रमण, मधुमास, पोखरा-मुक्तिनाथ र पदयात्रा छन् । होटलमा बस्ने, खाने र घुम्ने सम्बन्धी यी प्याकेज २ रातदेखि ४ रातसम्मका र ३ हजारदेखि २६ हजार मूल्य बीचका छन् ।
अभियानमा सहभागी पोखरा पर्यटन परिषद्का अध्यक्ष पोमनारायण श्रेष्ठले पोखराको नयाँ विमानस्थलबाट अन्तर्राष्ट्रिय उडानका लागि सरकारलाई दबाब दिइएको र आफूहरुको धैर्यताको बाँध टुटे आन्दोलन गर्न बाध्ये हुने चेतावनी दिए ।
नेपाल पर्यटन बोर्डका वरिष्ठ अधिकृत कुन्दन मिश्रले बोर्डको गठन, बनावट, उद्देश्य र गतिविधिबारे जानकारी गराए ।
नाट्टा गण्डकीका अध्यक्ष रचना पन्तले पोखराको पर्यटन प्रवर्द्धनका लागि सबैले सघाउनुपर्नेमा जोड दिइन् ।
सिद्धार्थ होटल एसोसिएसनका अध्यक्ष चन्द्रप्रकाश श्रेष्ठले गौतम बुद्ध अन्तर्राष्ट्रिय विमानस्थल उचितरुपमा सञ्चालनमा नआउनु दुर्भाग्य भएको भन्दै नियमित अन्तर्राष्ट्रिय उडानका लागि आफूहरु दबाबमूलक आन्दोलनमा लागेको जानकारी दिए ।
पर्यटन विकास परिषद् लुम्बिनीका कार्यकारी अधिकृत रामु जोशीले पर्यटनलाई अब फरक र एकीकृत ढंगले अगाडि बढाउनुपर्ने खाँचो औंल्याए ।
अभियानअन्तर्गत भैरहवा, नेपालगञ्ज, धनगढी र महेन्द्रनगरमा त्यहाँका पर्यटनसम्बद्ध पदाधिकारी, पर्यटन व्यवसायीसँग छलफल एवं गरिने संघका अध्यक्ष लक्ष्मण सुवेदीले बताए ।
पश्चिमबाट पर्यटकलाई पोखरा पठाउने र पोखराबाटसमेत पर्यटकलाई पश्चिम पठाउने उद्देश्य पनि कार्यक्रमको छ । आन्तरिक पर्यटन नै दिगो पर्यटनको आधार हो भन्ने मान्यता अनुरुप दुई दशक अघि सञ्चालित अभियानले भैरहवाका अतिरिक्त नेपालगञ्ज, धनगढी र महेन्द्रनगर पनि समेटेको संघका उपाध्यक्ष दीपक श्रेष्ठले बताए ।
पोखराका १ हजार २ सय होटलमा ४० हजार विस्तारा रहेको र यो क्षेत्रमा १५ हजार जनाले रोजगारी पाएको संघका महासचिव राजेन्द्र ढकालले बताए ।
