काठमाडौँ । नेपाली कांग्रेस र नेकपा माओवादी केन्द्रको विधान सम्मेलन सँगसँगै हुने भएको छ । अर्थात् दुवैको सम्मेलन फागुन पहिलो साता हुने भएको हो ।
नेपाली कांग्रेसको महासमिति बैठक फागुन ७ देखि १० गतेसम्म हुने तय भएको छ । कांग्रेसको महासमिति अर्थात् विधानसम्बन्धी छलफल हुने बैठक तेस्रो पटक सरेको हो ।
त्यस्तै माओवादी केन्द्रले आजमात्रै घोषणा गरी फागुन पहिलो साता विधान सम्मेलन हुने जनाएको हो । प्रधानमन्त्रीको सरकारी निवास बालुवाटारमा बसेको पदाधिकारी बैठकले सो विधान सम्मेलन गर्नको लागि विधान मस्यौदा समिति गठन गरेको छ ।
पार्टीका उपाध्यक्ष तथा केन्द्रीय प्रवक्ता अग्निप्रसाद सापकोटाका अनुसार सो समितिमा उपाध्यक्ष पम्फा भुसाल, महासचिव देव गुरुङ, उपमहासचिवत्रय गिरीराजमणि पोखरेल, वर्षमान पुन र जनार्दन शर्मा साथै सचिवद्वय गणेश शाह र हितमान शाक्य सदस्यको रुपमा रहेका छन् ।
माओवादी त्यस्तो पार्टी हो जसका अध्यक्ष पुष्पकमल दाहाल प्रचण्ड सदाबहार अध्यक्ष छन् ।
कांग्रेसले भने हरेक चार वर्षमा महाधिवेशन गर्दै सभापतिको निर्वाचन गर्दैै आएको छ । माओवादीले २०७८ सालमै महाधिवेशन गरेको थियो । कांग्रेसले २०७८ कै मंसिरमा महाधिवेशन गरी दोस्रो पटक शेरबादुर देउवालाई सभापति बनाएको थियो ।
कांग्रेसको १५ औँ महाधिवेशन २०८२ मा गर्ने गरी तयारी हुँदैछ ।
