फाल्गुनन्दको एक सय बतिस औं जन्मजयन्ती मनाइदै

प्रकाश धौलाकोटी, प्रकाशित मिति : २०७३ कार्तिक २५ बिहिबार
तेह्रथुम। महान् समाज सुधारक १६ औं राष्ट्रिय बिभुति फलामसिंह लिङदेन अर्थात् फल्गुनन्दको १३२ औँ जन्मजयन्ती बिहिबार किराँत धर्मावलम्बीहरुले देशैभर विविध कार्यक्रम गरी मनाइदैछ । सो अवसरमा तेह्रथुमको आठराई सक्रान्तिबजारमा विशेष कार्यक्रम हुँदैछ । बुधबारबाटै सुरु भएको कार्यक्रममा आज (बिहीबार) किराँत धर्मगुरु अंशीमाङ आत्मानन्द लिङ्देन र पवित्राहाङमा साँवा लिङदेनले संयुक्त रुपमा धार्मिक प्रवचन तथा उपदेश दिने कार्यक्रम रहेको छ । जन्मजयन्तीकै अवसरमा धर्मगुरु लिङदेन दम्पतीले सक्रान्तिबजारमा निर्मित फाल्गुनन्दको १५ फिट अग्लो ढुंगाको शालिक अनावरण समेत गर्ने कार्यक्रम रहेको छ ।
 
नेपाल सरकारको ७ लाख रुपैयाँ अनुदान सहयोग र बाँकी किराँत धर्मावलम्बी भक्तजन्हरुले गरी कुल २१ लाख रुपैयाँको लागतमा निर्माण गरिएको शालिक समुद्घाटन कार्यक्रममा संघीय मामिला तथा स्थानीय विकास राज्यमन्त्री श्रीप्रसाद जवेगु, कांग्रेस केन्द्रिय सदस्य तथा सांसद सीता गुरुङ, सभासद भवानी खापुङ र गणेश विमली, प्रमुख जिल्ला अधिकारी मुनका न्यौपाने, स्थानीय विकास अधिकारी प्रल्हादकुमार कार्की, जिल्लाका सुरक्षा निकायका प्रमुखहरु, राजनीतिक दलका नेताहरु लगायतले सम्बोधन गर्ने कार्यक्रम समेत रहेको छ ।
 
सोही कार्यक्रमबाट प्रमुख अतिथि राज्यमन्त्री जवेगूले सक्रान्तिबजारमा फाल्गुनन्द चौकको समुद्घाटन तथा माङहिम शिलान्यास गर्ने कार्यक्रम समेत रहेको आयोजक समिति अध्यक्ष डम्बरबहादुर ईङनामले बताए। प्रतिमा निर्माणले यसक्षेत्रको धार्मिक सांस्कृतिक महत्वलाई प्रचार प्रसार गर्दै पर्यटन प्रवर्धनमा सहयोग पुग्नेछ । इलामको चारखोलामा वि.स.१९४२ कात्तिक २५ गते जन्मेका फाल्गुनन्द किराँत धर्मका प्रवर्तक हुन् ।
 
 उनले १९८८ वैशाख २४ गते पाँचथर लब्रेकुटीमा ‘बृहत् किरात चुम्लुङ’ (सभा) बसाएर १० बुँदे लिखित सत्यधर्म मुचुल्का’ कायम गराएका थिए । उक्त मुचुल्का जारी गरेपछि किरात समुदायको परम्परा तोड्दै बलिप्रथा र मद्यपानको चलन हटाएर समाज सुधारको अभियान थालिएको थियो । 
 
फाल्गुनन्दले बलिपूजा नगर्नु त्यसको सट्टा फलफूल नैवेद्यबाट गर्नु भन्ने अभियान चलाएका थिए । मुचुल्कामा प्रत्येक गाउँ–गाउँमा मन्दिर र पाठशाला बनाउने, लेखपढ सिकाउने, छोरा र छोरीलाई बराबरी व्यवहार गर्नु भनेर सामाजिक थिति बसाएका थिए । यस्तै–यस्तै उनका सामाजिक योगदानलाई लिएर राज्यले १६ औं राष्ट्रिय विभूतिको रुपमा घोषणा गरेको हो । फाल्गुनन्दको निधन २००५ साल चैत २२ गते भएको थियो । 
 
नयाँ