ललितपुर एनएसएलको नयाँ च्याम्पियन, धनगढी दोस्रो पटक उपविजेता [फोटोफिचर]
हाम्रा कुरा
प्रकाशित २०८० पुष १४ शनिबार
553
Shares
काठमाडौँ । नेपाल सुपर लिग (एनएसएल) फुटबल प्रतियोगिताको दोस्रो संस्करणको उपाधि ललितपुर सिटी एफसीले जितेको छ । शनिबार भएको रोमाञ्चक फाइनलमा धनगढी एफसीलाई ३–२ ले हराउँदै ललितपुर नयाँ च्याम्पियन बनेको हो ।
शनिबार त्रिपुरेश्वरस्थित दशरथ रंगशालामा भएको खेलमा ललितपुरले १–० ले पछि परेको अवस्था उल्ट्याउँदै जितसहित उपाधि उचाल्न सफल भएको हो ।
खेलको ३७औँ मिनेटमा आफिज ओलावालेले गोल गर्दै धनगढीलाई अग्रता दिलाए पनि पहिलो हाफको इन्जुरी समयमा इमोह इजेकेलले गोल गर्दै ललितपुरलाई बराबरीमा ल्याए ।
५०औँ मिनेटमा दिनेश हेन्जनले गोल गर्दै ललितपुरलाई २–१ को स्थितिमा ल्याए । ५८ औं मिनेटमा इजेकेलले गोल गर्दै ललितपुरलाई ३–१ को स्थितिसहित जित नजिक पुर्याए ।
अन्तिम समयमा अहमद हिजाजीले गोल गर्दै धनगढीलाई ३–२ को स्थितिमा ल्याए पनि उपाधि जित्न भने सकेनन् ।
यसअघि ८०औँ मिनेटमा आगेमाङले रातो कार्ड पाएपछि धनगढी १० खेलाडीमा समेटिएको थियो । त्यसको फाइदा ललितपुरले उठाउनै परेन ।
तर यो हारले धनगढीलाई भने ठूलो मर्माहत भएको छ । धनगढी लगातार दोस्रोपटक उपविजेतामा सीमित बन्न बाध्य भएको हो । पहिलो संस्करणको फाइनलमा पनि धनगढी पराजित भएको थियो । पहिलो संस्करण काठमाडौं रेजर्सले जितेको थियो ।
लिग चरणमा ८ खेलमा ३ जित, ४ बराबरी र एक खेलमा हार बेहोरेर १३ अंकसहित दोस्रो स्थानमा रहँदै प्लेअफमा पुगेको धनगढी पहिलो क्वालिफायरमा पोखरा थण्डर्सलाई पराजित गर्दै फाइनलमा पुगेको थियो ।
त्यस्तै लिग चरणमा ८ खेलमा २ जित, ४ बराबरी र २ हार बेहोरेको ललितपुर सिटीले इलिमिनेटरमा काठमाडौँलाई र दोस्रो क्वालिफायरमा पोखरा थण्डर्सलाई पराजित गर्दै फाइनलमा पुगेको थियो ।
