एघार दिनदेखि नरिवल पानी मात्रै पिएका मोदीले राम मन्दिरको गर्भगृहमा गर्दै पूजा

हाम्रा कुरा

प्रकाशित २०८० माघ ८ सोमबार

अयोध्या । भारतीय प्रधानमन्त्री नरेन्द्र मोदी आज अयोध्यामा राम मन्दिरको प्राण प्रतिष्ठामा सहभागी हुँदैछन् । उनले राम मन्दिरको गर्भगृहमा पूजा गर्नका लागि ११ दिनदेखि कठिन अनुष्ठान गरिरहेका छन् ।

प्रधानमन्त्री मोदी कम्बल ढाकेर भुइँमा सुतेर दिनभर नरिवल पानी मात्र पिइरहेका छन् र उनले दिनहुँ विभिन्न किसिमका चन्दा पनि दान गरिरहेका छन् ।

रामजन्मभूमि तीर्थ क्षेत्र ट्रस्टका कोषाध्यक्ष स्वामी गुरुदेव गिरिजी महाराजले आजको कार्यक्रममा मोदीले के कार्यक्रम गर्ने भन्नेबारे सञ्चारमाध्यमलाई जानकारी दिएका छन् ।

स्वामी गुरुदेव गिरिजी महाराजले भने, ‘अयोध्याको राम मन्दिर पुगेपछि प्रधानमन्त्री मोदी सबैभन्दा पहिले नुहाउन जानेछन्, त्यसपछि प्रधानमन्त्री मोदी पहिले उत्तरको ढोकाबाट जानेछन् र त्यसपछि पूर्वको ढोकाबाट प्रवेश गर्नेछन्, जहाँ मुख्य मन्दिरको प्रवेशद्वार हो, मन्दिरमा प्रवेश गरेपछि प्रधानमन्त्रीले पहिले ट्रस्टीहरूसँग भेट गर्नेछन्। त्यसका लागि हामीले समाजका विभिन्न विशिष्ट व्यक्तिहरूलाई बोलाएका छौं।’

राम जन्मभूमि तीर्थ क्षेत्र कोषका कोषाध्यक्षले भने, ‘मन्दिरमा प्रवेश गरेपछि मन्त्रद्वारा १० वटा विभिन्न किसिमका स्नान गर्नुपर्छ । १० पटक मन्त्रद्वारा पानी छर्किने छ । त्यसपछि प्रधानमन्त्रीलाई १० प्रकारका दान दिइनेछ ।’ उनका अनुसार यसपछि प्रधानमन्त्री मोदी गर्भगृहमा प्रवेश गर्नेछन् ।

बिहान ११ः३० बजे गर्भगृह पूजा हुनेछ । यो पूजा एक घण्टा चल्नेछ ।

१२ः२९ः०८ बजे शुभ मुहूर्तको क्षण हुनेछ । त्यो जम्मा ८४ सेकेन्डको हुनेछ । यो १२ः३०ः३२ बजेसम्म चल्नेछ ।