काठमाडौँ । भारतको अयोध्यामा नवनिर्मित राम मन्दिरको प्राण प्रतिष्ठा भइरहेको छ । हजारौँ हिन्दूधर्मीहरु अयोध्यामा रहेका छन् ।
सो क्रममा भारतीय कलाकारहरु पनि अयोध्यामा पुगेका छन् । अभिनेता अमिताभ बच्चन पुत्र अभिषेक बच्चनका साथ अयोध्या पुगेका छन् । त्यसैगरी विकी कौशल, कटरिना कैफ, रणवीर कपूर, आलिया भट्ट, रोहित सेट्टी, अनुपम खेर, चिरञ्जीवी, राम चरण, कुमार विश्वास, अनिल कुम्बलेलगायत थुप्रै सेलिब्रिटीहरु अयोध्याको राम मन्दिरमा पुगेका छन् ।
अनुपम खेरले हिन्दू धर्ममा यस्तो माहोल यसअघि नदेखेको भन्दै निकै नै उत्साही भएको बताएका छन् ।
गायक सोनु निगमले जयश्री रामको भजन गाएका छन् ।
स्थानीय समयअनुसार बिहान ५ बजेदेखि नै मन्दिरको ढोका खुलेको थियो । बिहान १० बजेदेखि मंगल ध्वनि बज्न शुरु भएको थियो । नयाँँ मन्दिरमा भगवान् रामको प्राण प्रतिष्ठा भइरहेको हो ।
आठ हजार भन्दा बढीलाई विशेष अतिथिका रुपमा निमन्त्रणा दिइएको थियो । करिब ५० देशका मानिसलाई विशेष अतिथिका रुपमा बोलाइएको छ ।
भारतीय प्रधानमन्त्री नरेन्द्र मोदी बिहान अयोध्या पुगे । त्यस्तै पूर्व राष्ट्रपति रामनाथ कोविन्द, पूर्व उपराष्ट्रपति वेंकैया नायडू, मुकेश–नीता अम्बानी, गौतम अदाणी लगायत पनि सहभागी छन् ।
यसअघि गत माघ २ गते १६ जनवरीदेखि प्राण प्रतिष्ठाको प्रक्रिया शुरु भएको थियो । विभिन्न अनुष्ठान चलिरहेको थियो । भगवान् रामको नया मूर्ति माघ ३ गते मन्दिर परिसरमा प्रवेश गराइएको थियो ।
गत वर्ष माघमा नेपालको कालीगण्डकीबाट राम मन्दिरका लागि दुई ओटा देवशीला अयोध्या लगिएको थियो ।
बिहान ११ः३० बजेदेखि गर्भगृह पूजा भइरहेको छ । यो पूजा एक घण्टा चल्नेछ ।
१२ः२९ः०८ बजे शुभ मुहूर्तको क्षण हुनेछ । त्यो जम्मा ८४ सेकेन्डको हुनेछ । यो १२ः३०ः३२ बजेसम्म चल्नेछ ।
दिउँसो १२ः३० बजे मूख्य अतिथिहरुको भाषण हुनेछ ।
दिउँसो २ बजेदेखि ७ बजेसम्म अतिथिहरुले भगवान् रामको दर्शन गर्नेछन् ।
