गण्डकी । पराङ, सुथरी, दाबिलो, साज, जाबो, डालीलगायत सामग्री जोरजाम पारेपछि मह शिकारी अक्करे भिरतिर उकालो लाग्छन् । भिरको टुप्पोमा पुगेपछि सुरु हुन्छ, भिरमौरीको मह शिकार ।
शिकारीहरु पहिले पितृ र प्रकृतिलाई पुकार्छन् । शिकारका बेला कुनै अप्रिय घटना नहोस् भनेर कामना गर्छन् । शिकारमा १५ देखि २० जनासम्मको समूह हुन्छ ।
टोली नेताले शिकारको नेतृत्व सम्हाल्छन् । मुख्य शिकारीलाई ‘भिरौटे’ भनिन्छ । जो पराङमा झुण्डिएर मह काढ्न भिर छिचोल्छन् । ज्यानकै बाजी उठाएर मह काढ्छन् । पहाडी भेगका भीमकाय भिर र पहरामा बर्सेनि गाउँलेहरु यसरी मह शिकारमा रमाउँछन् । पितापुर्खाले छाडेको सीपलाई पछ्याउँदै उनीहरुले मह शिकारको चलन धानिरहेका छन् ।
मङ्गलबारदेखि मह शिकारमा व्यस्त बागलुङको ताराखोला गाउँपालिका-५ का रतनबहादुर घर्तीले आफूले ३० वर्षदेखि भिरमौरीको मह काढ्दै आएको बताए ।
‘हाम्रा बाउबाजेले सिकाएको मह शिकारको ज्ञान र सीपलाई हामीले अँगालेका छौं’, उनले भने, ‘हरेक वर्ष ताराखोलामा मह शिकार हुँदै आएको छ ।’
घर्तीका अनुसार ताराखोला-५ को ठूलो भिर र माडो भिरमा धेरै मात्रामा भिरमौरी पाइन्छ । यस वर्ष ठूलो भिर सामुदायिक वन क्षेत्रमा आठ घार भिरमौरीबाट २६० लिटर मह काढिएको उनले बताए ।
‘मङ्गलबारदेखि जुल्फे सामुदायिक वनमा पर्ने माडो भिरमा मह काढ्न सुरु गरिएको छ’, ५१ वर्षीय घर्तीले भने, ‘१४ घारको मह काढ्न अझ एकदुई दिन लाग्नसक्छ ।’
ताराखोलाका अन्य भिरमा पनि एकदुई घार मौरी रहेको उनले बताए । कुनै वर्षमा दुई याममा मह पाइने भए पनि प्रायः वर्षको एक पटकमात्र मह काढ्न मिल्ने घर्तीको भनाइ छ ।
मह शिकार जोखिमपूर्ण हुने हुँदा जो-कसैले सजिलै गर्न नसक्ने जुल्फे सामुदायिक वन उपभोक्ता समूहका सचिव नारायण घर्तीले बताए ।
‘मह शिकार साहसिक र उत्तिकै जोखिमपूर्ण पनि हुन्छ, आँट र कौशल भएकालाई मात्र शिकारमा पठाउने गरिन्छ’, उनले भने, ‘पराङमा झुण्डिएर मह काढ्नुपर्छ, मौरीले आक्रमण गर्ने उस्तै डर हुन्छ ।’
मह शिकारका लागि चाहिने अधिकांश सामग्री लेकाली चोयाबाट बनाउने गरिन्छ । चोया र काठबाट बनेको पराङ (भर्याङ) मह शिकारका लागि चाहिने मुख्य सामग्री हो । त्यसकै सहायतामा शिकारीहरु भिरमा पुग्छन् । सुथरी (डोरी), चाका झिक्ने साज, मह राख्ने डाली पनि निगालोको चोयाबाट बनाउने गरिएको सचिव घर्तीले बताए ।
‘पराङलाई रुख र रुख नभएको ठाउँमा ठूलो ढुङ्गामा बाँधेर भिरमा खसालिन्छ, त्यसबाटै शिकारी मौरीको घार नजिक पुग्छन्’, उनले भने, ‘निगालोको टुप्पोमा हँसिया बाँधेर साज बनाइन्छ, त्यसैले काटेर महको चाका घारबाट छुट्टाइन्छ र तलपट्टि डालीमा थापिन्छ ।’
मौरीको टोकाइबाट बच्न जाबोले मुहार छोप्ने गरिएको उनको भनाइ छ । मह निकालेपछि शिकारमा संलग्न र अरु सहभागीलाई बाँड्ने प्रचलन छ । धेरै मात्रामा मह निस्केमा बाहिर बिक्रीसमेत गर्ने गरिएको सचिव घर्तीले बताए । एक लिटर महलाई एक हजार पाँच सय रुपैयाँसम्ममा बिक्री गर्ने गरिएको छ ।
‘संस्कृति र परम्पराका रुपमा घरगाउँमा भिर महको शिकार हुँदै आए पनि अब यसलाई व्यवसायिक बनाउन जरुरी छ’, सचिव घर्तीले भने ।
ताराखोलाकै मपेसमा रहेको तीन घार भिरमौरीको मह पनि काढ्ने तयारी भइरहेको जनाइएको छ । ग्रामीण पर्यटन प्रवर्द्धनमा भिर महलाई जोड्दै आएको गलकोट नगरपालिका-१० रमुवाको सरस्वती युवा क्लबले अहिले ‘मह शिकार महोत्सव’कै आयोजना गरेको छ । वडा कार्यालयसँग मिलेर क्लबले बर्सेनि मह शिकार कार्यक्रम आयोजना गर्दै आएको क्लबका अध्यक्ष उदिम घर्तीले बताए ।
पछिल्लो समय साहसिक मह शिकार पर्यटकीय आकर्षणसमेत बन्न थालेको उनको भनाइ छ । औषधिजन्य गुण र स्वास्थ्यवर्द्धक मानिने हुँदा उपभोक्ताले पनि खोजीखोजी भिर मह प्रयोग गर्छन् । मह शिकार हेर्न र महको स्वाद लिन पनि रमुवामा आगन्तुकको सङ्ख्या बढ्दै गएको अध्यक्ष घर्तीले बताए ।
रमुवाका भिरमा प्रशस्त भिर मौरी पाइने गलकोट-१० का अध्यक्ष भक्तबहाुदर काउचाले बताए । गाउँलेले पुस्तौंदेखि मह शिकार गर्दै आएको उन भनाइ छ । ‘अनुभवी शिकारीले रैथाने सीप र प्रविधिमार्फत मह शिकार गर्दै आएका छन्’, वडाध्यक्ष काउचाले भने, ‘पछिल्लो समय यसलाई उत्सवकै रुपमा लिन थालिएको छ ।’
मह शिकारलाई साहसिक पर्यटनसँग जोड्नुपर्नेमा उनले जोड दिए । ताराखोला, बडिगाड, गलकोटको रमुवालगायत बागलुङका अन्य ठाउँमा पनि मह शिकार हुँदै आएको छ ।
गलकोट नगरपालिका-४ निलुवामा पनि केही वर्षअघि ‘मह शिकार महोत्सव’ आयोजना गरिएको थियो । निलुवाको पाँच सय मिटर अग्लो भिरमा पनि रमुवाकै अनुभवी शिकारीले मह काढेका थिए ।
कास्कीको अन्नपूर्ण गाउँपालिका-७ लान्द्रुकस्थित कोटेसाङमा आउँदो जेठ ८ देखि १० गतेसम्म ‘मह शिकार महोत्सव’ आयोजना गरिएको छ ।
पर्यटन प्रवर्द्धनसँगै स्थानीय कला तथा संस्कृतिको संरक्षण हेतु उक्त महोत्सव गर्न लागिएको वडाध्यक्ष भरतमान गुरुङले बताए । रासस
