प्रिमियर लिगको उपाधि आर्सनल र म्यानसिटीमध्ये एकलाई, यसरी हुँदैछ छिनोफानो

हाम्रा कुरा

प्रकाशित २०८१ वैशाख ३१ सोमबार

काठमाडौँ । इङ्गलिश प्रिमियर लिग फुटबल अन्तर्गत आर्सनलले म्यानचेस्टर युनाइटेडलाई पराजित गर्दै उपाधि दौडमा आफूलाई कायमै राखेको छ ।

गएराति सम्पन्न खेलमा आर्सनलले म्यानचेस्टर युनाइटेडलाई १–० गोल अन्तरले पराजित गरेको हो । आर्सनलका लागि लिन्द्रो ट्रोसार्डले खेलको २०औं मिनेटमा गरेको गोल नै खेलको निर्णयक गोल बनेको थियो ।

यो जितपछि आर्सनल लिगको शीर्ष स्थानमा उक्लिएको छ । ३७ खेलमा आर्सनलको ८६ अंक रहेको छ । त्यस्तै एक खेल कम खेलेको म्यानचेस्टर सिटीको ३६ खेलमा ८५ अंक रहेको छ ।

अब आर्सनलले आफ्नो अन्तिम लिग खेल मे १९ मा एभर्टनसँग खेल्ने छ । त्यस्तै म्यानचेस्टर सिटीले भने मे १५ मा टोटनह्यामसँग र मे १९ मा वेस्टह्याम युनाइटेडसँग खेल्नेछ ।

अब दुवै टिमको अन्तिम खेलबाटै उपाधिको छिनोफानो हुनेछ । म्यानसिटीले दुवै खेल जितेका खण्डमा आर्सनलको जितले पनि उपाधि जित्न सिटीलाई रोक्न सक्ने छैन ।

त्यसैगरी यो हारपछि म्यानचेस्टर युनाइटेडको भने ३६ खेलमा ५४ अंक रहेको छ र लिगमा आठौँ स्थानमा छ ।