काठमाडौँ । सरकारले ठूलो संख्यामा सहसचिव सरुवा गर्दा कीर्ते काण्डमा मुछिएका बसन्त अधिकारीलाई गृह मन्त्रालयमा पठाएको छ । कर्मचारी भर्ना प्रकरणमा कीर्ते काण्डमा मुछिएपछि काठामडौँ महानगरपालिकाले हाजिर गर्न नदिएपछि सरुवा मागेर हिँडेका अधिकारीलाई गृहमन्त्री रवि लामिछानेले आफ्नो मन्त्रालयमा ल्याएका हुन् । 

काठमाडौँ महानगरपालिका स्वास्थ्य प्रबर्द्धन केन्द्रमा कर्मचारी भर्ती गर्दा तत्कालीन प्रमुख प्रशासकीय अधिकृत बसन्त अधिकारी ‘कीर्ते’ काण्डमा मुछिएका थिए  । 

त्यतिबेला काठमाडौँ महानगरपालिकाका प्रमुख प्रशासकीय अधिकृत बसन्त अधिकारीले चढ्दै आएको सरकारी गाडी खोसेर हाजिर गर्न दिइएको थिएन । 

महानगरपालिकाको कार्यपालिकाको निर्णय प्रमाणीकरण र कार्यान्वयनमा अनियमितता गरेको भन्दै मेयर वालेन्द्र साह (बालेन) ले प्रमुख प्रशासकीय अधिकृत बसन्त अधिकारीलाई १६ पुसमा बिदामा बस्न निर्देशन दिएका थिए भने तीन कर्मचारीलाई निलम्बन गरेका थिए ।

कार्यपालिकाकै निर्णयमा कैफियत भेटिएपछि क्रुद्ध बनेका मेयर बालेनले उनलाई थुन्नसमेत भनेका थिए । गल्ती स्वीकार्दै अधिकारीले कार्यपालिकाको निर्णय प्रमाणीकरण गर्दा आफूलाई झुक्काएर हस्ताक्षर (सही) गराइएको प्रशासनसँग बताएका थिए । 

बालेनको सचिवालयले ल्याएको निर्णय प्रमाणीकरण गर्ने क्रममा दुई वटा पानामा फरक–फरक तथ्याङ्क राखेर आफूलाई झुक्काएको उनको भनाइ थियो ।  त्यस विषयमा छानवीन समिति नै बनाइएको थियो । 

समितिले छानबिन गरिरहँदा महानगर फर्किन खोजेपछि प्रमुख प्रशासकीय अधिकृत अधिकारीको कार्यकक्षमा ताला लगाइएको थियो । 

उनीसँगै उक्त काण्डमा मुछिएका स्वास्थ्य विभाग प्रमुख रामप्रसाद पौडेल अहिले पनि महानगरमा जान सकेका छैनन् । महानगरबाट कारबाही भोगेर हाजिर गर्न नपाएपछि अधिकारी काठमाडौँ महानगरपालिकाबाट मधेसी आयोगका सरुवा भएका थिए ।

 कीर्तेकाण्डको छानबिन गर्नु  पर्ने दायित्व बोकेको गृह मन्त्रालयमै लामिछानेले बसन्तलाई किन लगे भन्नेमा शंका उत्पन्न भएको छ । 

रविको मन्त्रालयमा विवादितहरुकै बाहुल्यता रहेको छ । नक्कली लाइसेन्स प्रकरणमा मुछिएका गोगनबहादुर हमाल र नारायणप्रसाद भट्टराई पनि त्यही रहेका छन् । 

अर्का विवादित सहसचिव रुद्रप्रसाद पण्डितलाई भने सरुवा गरिएको छ । अर्का विवादास्पद कर्मचारी रामचन्द्र तिवारी पनि गृहमा आएका छन् ।