काठमाडौँ । सांसदहरुले आफ्नो दायित्व भुल्दै जाँदा संसदको गरिमा घट्दै गएको छ । सांसदहरूको हाटा (हाजिर गर्ने अनि टाप कस्ने) प्रवृतिले संसदको गरिमा घट्दै गएको हो ।
प्रतिनिधि सभा बैठकमा यतिबेला आर्थिक वर्ष २०८१–०८२ को राजस्व र व्ययको वार्षिक अनुमान (बजेट) माथिको सामान्य छलफल जारी छ । तर संसदमा सांसदहरुको संख्या न्यून छ ।
सांसदहरुले संसदमा हाजिर गर्ने, अनि पाए शून्य समयमा बोल्ने तथा बजेटमाथि धारणा राखेर टाप कस्ने प्रवृत्ति अँगालेका हुन् ।
कतिपय सांसदहरु त शून्य समयमा बोलेर टाप कस्ने खालका पनि छन् । संसद अवरुद्ध भए बरबादै भयो भनेर डंका पिट्ने अनि खुल्यो भने रित्तै पारेर हिँडिदिने प्रवृृत्तिकै कारण सांसदहरुले आफ्नो खुट्टामा बञ्चराले हानिरहेका हुन् ।
यतिसम्मकि सत्ता पक्षीय सांसदहरुसमेत यो गलत प्रवृत्तिबाट मुक्त हुन सकेका छैनन् । पछि पछि बोल्ने सांसदहरुले सुन्ने कम हुँदा डेस्कबेन्चलाई सुुनाएजस्तो पनि भान हुन्छ ।
