घरमा खेल्नुपर्ने फुटबल साउदीको मैदानमा, विश्वकप छनोटमा नेपालले यमनसँग खेल्दै
हाम्रा कुरा
प्रकाशित २०८१ जेठ २९ मंगलबार
385
Shares
काठमाडौँ । नेपालले फिफा विश्वकप २०२६ र एसियन कप २०२७ को संयुक्त छनोट अन्तर्गत आज यमनसँग खेल्दैछ । साउदी अरेबियास्थित प्रिन्स मोहमद बिन फहद स्टेडियममा हुने यो खेल नेपाली समय अनुसार राति ११ः४५ बजेदेखि शुरु हुनेछ ।
यसअघि गत बिहीबार खेलेको खेलमा नेपाल यूएईसँग ४–० ले पराजित भएको थियो । घरेलु मैदानमा खेल्नुपर्ने यी खेल दशरथ रंगशालाको मैदान अन्तर्राष्ट्रिय खेल खेल्न मिल्ने नभएपछि ‘न्युट्रल भेन्यु’ को रुपमा साउदी अरेबियामा खेलेको हो ।
एएफसीले दशरथ रंगशालाको पूर्वाधार अन्तर्राष्ट्रिय खेल खेलाउन मिल्ने नभएको बताएपछि नेपालले घरेलु मैदानमा खेल्ने अवसर गुमाएको हो ।
नेपालले यसअघि पनि घरेलु मैदानमा खेल्नुपर्ने बहराइनविरुद्ध खेल पनि बहराइनमै खेलेको थियो ।
समुह एचमा रहेको नेपालले यस विश्वकप छनोटमा लगातार पाँचौँ हार बेहोरेको छ । नेपाल यसअघि यमनसँग गत नोभेम्बर २१ मा भएको खेलमा २(० ले पराजित भएको थियो ।
