काठमाडौँ । पूर्व गृहमन्त्री एवम् नेकपा एमालेका उपाध्यक्ष रामबहादुर थापा बादलका छोरा प्रतीक थापा पक्राउ परेका छन् ।
उनलाई सीआईबीको टोलीले बौद्धबाट शुक्रबार साँझ पक्राउ गरेको हो । नक्कली भुटानी शरणार्थी प्रकरणमा पतीक लामो समयदेखि फरार थिए ।
उनलाई आफ्नै निवासमा आएको बखत पक्राउ गरिएको हो । निमित्त प्रहरी महानिरीक्षक (एआईजी) दीपक थापाले उनी पक्राउ परेको पुष्टि गरेका छन् ।
प्रतीकलाई महानगरीय प्रहरी परिसरको हिरासतमा लगिएको छ । नेपालीलाई नक्कली भुटानी शरणार्थी बनाएर अमेरिका पठाउन गरिएको अपराध अभियोगमा गत वर्ष सरकारी वकिलको कार्यालय काठमाडौँले थापालाई फरार सूचीमा राखेको थियो ।
रामबहादुर थापा गृहमन्त्री भएका बखत बिचौली र गृह मन्त्रालयकै कर्मचारीहरुसँग मिलेर प्रतीकले शरणार्थी प्रकरणमा रकम असुली गरेको आरोप छ ।
२०७९ चैतमा शरणार्थी प्रकरणका केही आरोपित पक्राउ परेपछि थापा फरार थिए । २०८० बैशाख २१ मा प्रेस विज्ञप्ति जारी गरी प्रतीकले आफू यसमा संलग्न नरहेको भन्दै अनुसन्धानलाई सघाउने बताएका थिए ।
तर प्रहरी अनुसन्धानकै क्रममा उनी फरार थिए । थापाकै सुरक्षा सल्लाहकार इन्द्रजीत राई, टोपबहादुर रायमाझी लगायतका सो प्रकरणमा थुनामा रहेका छन् भने राईका छोरा निरज राई अहिले पनि फरार रहेका छन् ।
