पोखरा । गण्डकी प्रदेशमा करिब ५० प्रतिशत क्षेत्रफलमा रोपाइँ भएको छ । यो तथ्यांक असार तेस्रो सातासम्मको हो । जसमा सबैभन्दा बढी कास्कीमा ६ हजार नौ सय ७५ हेक्टरमा रोपाइँ भएको प्रदेश कृषि विकास निर्देशनालयले जनाएको छ । सबैभन्दा कम गोरखामा ४ सय ५६ हेक्टर क्षेत्रफलमा रोपाइँ भएको निर्देशनालयले जनाएको छ ।
निर्देशनालय प्रमुख वासुदेव रेग्मीका अनुसार यो वर्ष प्रदेशभरिमा करिब ९८ हजार हेक्टर क्षेत्रफलमा धानखेती हुने अनुमान छ । केही दिनयता मनसुन सक्रिय भएकाले किसान रोपाइँमा व्यस्त छन् । प्रमुख रेग्मीका अनुसार यही असार १५ गतेसम्ममा प्रदेशमा १५ प्रतिशत क्षेत्रफलमा रोपाइँ भएकामा त्यसयता बढेर ५० प्रतिशत पुगेको छ ।
अधिकांश क्षेत्रमा असारभित्रैमा रोपाइँ सकिने उनको भनाइ छ । बाह्रैमास सिँचाइ सुविधा भएका र दुई बाली फल्ने खेतमा रोपाइँ छिटो हुने गरेको छ । आकाशे पानीमा निर्भर किसान पनि यतिबेला रोपाइँमा व्यवस्त छन् ।
निर्देशनालयका कृषि अधिकृत रञ्जना पोखरेलका अनुसार यो वर्ष रोपाइँका लागि मलको अभाव छैन । प्रदेशको कुल ४ लाख ७९ हजार ६ सय १७ हेक्टर खेतीयोग्य जमिनमध्ये बर्सेनि १ लाख हेक्टर वरिपरि वर्षे धान खेती हुँदै आएको छ । हिमालपारिका जिल्ला मुस्ताङ र मनाङबाहेक प्रदेशका ९ जिल्लामा धानखेती हुँदै आएको छ ।
गण्डकीका सबैभन्दा धेरै धानखेतीको क्षेत्रफल भएको जिल्लामा पहिलो नवलपुर र दोस्रोमा कास्की हो । यस्तै स्याङ्जा, तनहुँ पनि धानखेतीको क्षेत्रफल बढी हुने जिल्लामा पर्दछ ।
धानखेतीका लागि कास्कीको मकैखोला, हाँडीखोला, पामे र लेखनाथ, गोरखाको छेवेटार, पालुङटार, आरुघाट, सिरानचोक, लमजुङको धमिलीकुवा, हर्राबोट, भोर्लेटार, करापुटार, तनहुँको चुँदीफाँट, सत्रसय फाँट, कलेस्तीफाँट पकेट क्षेत्र तोकिएको छ ।
यस्तै पर्वतको फलेबास, जलजला, म्याग्दीको भगवती, पिप्ले, घतान, बागलुङको बडिगाड, गलकोट, जैमिनी र नवलपुरको कावासोती, गैँडाकोट, स्याङ्जाको पुतलीबजार, आँधीखोला, गल्याङलगायतलाई धानका पकेट क्षेत्र तोकिएको छ ।
गण्डकीमा सावित्री, रामधान, जेठोबूढो, खुमल, सुक्खा, एक्ले, पहेँले, गौरिया, मनुसली, सुनौलो सुगन्धलगायत जातका धानको खेती हुँदै आएको छ ।
