काठमाडौँ । नेपाली कांग्रेसका महामन्त्री गगनकुमार थापाले भदौ महिनाभर मन्त्रीहरूलाई मौनव्रत लिन आग्रह गरेका छन् ।
प्रतिनिधि सभाको बैठकमा विशेष समय लिएर बोल्दै महामन्त्री थापाले एमाले र कांग्रेस मिलेर बनेको सरकारले एक महिना पूरा गरेको भन्दै अब मन्त्रीहरूले खादा लगाएर हिँड्ने नभइ काम गर्नुपर्ने बताएका हुन् ।
उनले केपी शर्मा ओली नेतृत्वको सरकारको कार्यकाल दुई वर्षको भएको र मन्त्रीहरूले २४ मध्ये एक महिना खादा लगाउँदा सकिएको बताउँदै अब भने कामको आधारमा प्रशंसा र आलोचना गर्ने बताए ।
उनले प्रत्येक मन्त्रीले २४ महिनामा आफूले के गर्छु भनेर कार्यक्रम बनाएकै हुनुपर्नेमा जोड दिए । जनताले थाहा पाउने गरी तुरुन्तै प्राप्त गर्न सकिने काम पनि गर्न पूर्व स्वास्थ्य मन्त्री थापाले सुझावसमेत दिएका छन् ।
उनले प्रत्येक मन्त्रालयसँग जोडिएका साना साना कामहरू गरेर देखाउन आग्रह गरे । मन्त्रीहरूको इच्छाशक्ति र नियत राखे काम सजिलै गर्न सकिने उनले बताए ।
एउटा मन्त्रालयले मात्र नसके दुई वा तीन मन्त्रीहरू ४८ घण्टा सँगसँगै बस्ने हो भने जस्तोसुकै अप्ठेरो काम पनि गर्न सकिने उनले बताए ।
उनले भदौ महिनामा मौनव्रत बसेर काम गर्न सुझाउँदै भने, ‘साउन राम्रो महिना पनि सकियो, तीर्थव्रत पनि सकिन लाग्यो । भदौ लाग्न लाग्यो । भदौ १ महिना हाम्रा माननीय मन्त्रीज्यूहरूले व्रत लिइदिनुस् । के व्रत भने नबोल्ने व्रत । उद्घाटन नगर्ने व्रत ।’
उनले थप अगाडि भने, ‘बिहान समाचार पढे पनि म यस्तो गर्दिन्छु भन्या छ, म यो ठोक्दिन्छु भन्या छ, खोइ ? अरे बाबा गर्ने ठाउँ भएपछि त गर्ने हो नि । हामी अहिले बोल्ने ठाउँमा छौँ हामी बोल्ने हो । हेर्नुस् त बोल्ने ठाउँका साथीहरू बोल्न पाउँ बोल्न पाउँ भनिराख्नुभाछ । अस्ति गर्ने ठाउँमा गएको गरेको देखेकै हो । बोल्ने बेलामा बोल्ने गर्ने बेलामा गर्ने । माननीय मन्त्रीज्यूहरू गर्ने ठाउँमा हुनुहुन्छ । मजाले गर्ने ।’
उनले मन्त्रीले एउटा काम गरे आफूहरूले पाँच गुणा प्रचार गरिदिने पनि वाचा गरे । महामन्त्री थापाले भने, ‘प्रत्येक दिन मन्त्रीज्यूहरूको भाषण सुनिराख्या छ कि हामी देश विकास गर्न आएको हो हामी चमत्कार गर्छौँ । अरे बाबा गर्दिनुस् न । तपाईंहरूले एक महिना नबोल्नुस् भदौभर । भदौभरि हामी बोल्छौँ । यति मजाले बोल्छौँ । तपाईहरू एउटा काम गरिदिनुस् त्यसलाई पाँच गुणा प्रचार गर्ने जिम्मा हाम्रो ।’
कांग्रेस र एमालेका सांसदहरूको टेबुल ठोकाइले गर्जन पनि ठूलै आउने बताउँदै उनले भने, ‘हेर्नुस् त कति छौँ हामी कांग्रेस एमाले । धमाधम तपाईंहरूले काम गर्ने हामीले यहाँ बोल्ने टेबुल ठोक्ने । तपाईंहरू बाहिर बोल्दै नबोल्ने । मन्त्री यहाँ आउने हाम्रा कुरा सुन्ने ठपक्क मन्त्रालय जाने काम गर्ने परिणाम दिने ।’
उनले प्रधानमन्त्री केपी शर्मा ओलीले पनि भ्रष्टाचार गर्दिन भनेर भाषण गरिरहन आवश्यक नभएको बताएका छन् । उनले भने, ‘कहीँ कतै मन्त्रीको अन्तर्वार्ता पढ्न नपरोस् । कहीँ कतै भाषण सुन्न नपरोस् । र सम्माननीय प्रधानमन्त्रीज्यूको पनि म ठाउँ ठाउँमा गएर भ्रष्टाचार पनि गर्दिन गर्न पनि दिन्न भन्ने होइन । त्यो प्रधानमन्त्री भनिराख्नै पर्दैन । प्रधानमन्त्रीले गर्नै पाउँदैन त्यसैले भन्नै भएन । तर गर्ने कुरा के हो भने अहिले संसदमा कानून छ । त्यो कानूनमा मद्धत गर्ने, प्रकरणहरूमा सही रुपमा निरुपण गर्ने, यो काम सम्माननीय प्रधानमन्त्रीज्यूबाट होस् भन्ने म आग्रह गर्न चाहन्छु ।’