प्रिमियर लिगमा आर्सनल र लिभरपुलको विजयी शुरूआत, चेल्सी र म्यानसिटी भिड्दै
हाम्रा कुरा
प्रकाशित २०८१ भदौ २ आइतबार
268
Shares
काठमाडौँ । इङ्गलिश प्रिमियर लिगको नयाँ सिजनमा आर्सनल र लिभरपुलले विजयी शुरूआत गरेका छन् । शनिबार सम्पन्न खेलमा आर्सनलले वोल्भ्सलाई २–० गोल अन्तरले पराजित गर्दै विजयी शुरूआत गरेको हो ।
आर्सनलको जितमा काई हावर्ट्ज र बुकायो साकाले एक एक गोल गरेका थिए । खेलको २५औँ मिनेटसमा हावर्ट्जको गोलमा आर्सनलले शुरूआती अग्रता लिएको थियो । त्यसपछि खेलको ७४औं मिनेटमा साकाले अग्रता दोब्बर बनाएका थिए ।
यो जितपछि आर्सनलले महत्वपूर्ण ३ अंक बटुलेको छ र नयाँ सिजनको शानदार शुरूआत गरेको छ ।
त्यस्तै उपाधि दावेदार लिभरपुलले पनि विजयी शुरूआत गरेको छ । लिभरपुलले इस्पविच टाउनलाई २–० ले नै हरायो । डिएगो जोटा र मोहम्मद सलाहले १–१ गोल गरे ।
त्यस्तै बाइटनले इभर्टनलाई ३–० ले तथा एस्टन भिल्लाले वेष्ट ह्याम युनाइटेडलाई २–१ ले हराउँदै विजयी शुरुआत गर्यो । न्यूक्यासल युनाइटेडले साउथह्याम्पटनलाई १–० ले हराउँदा नटिंघम र बर्नमाउथले १–१ गोलको बराबरी खेले ।
यसअघि गएराति शुक्रबार राति भएको उद्घाटन खेलमा म्यानचेष्टर युनाइटेडले फुल्हमलाई १–० ले हराएको थियो ।
पहिलो चरणका अन्तिम दुई खेल आज हुँदैछन् । ब्रेन्टफोर्डले घरेलु मैदानमा क्रिष्टल प्यालेससँग घरेलु मैदानमा साँझ ६ः४५ बजे खेल्नेछ ।
पहिलो चरणको सबैभन्दा प्रतिस्पर्धात्मक भिडन्तमा चेल्सी र म्यानचेष्टर सिटी भिड्दैछन् ।
यो खेल चेल्सीको मैदानमा राति सवा ९ बजे शुरु हुनेछ । सिटी लगातार पाँच पटक उपाधि जितेर कीर्तिमान फराकिलो बनाउन चाहन्छ ।
