काठमाडौँ । मेसेजिङ एप टेलिग्रामका सीईओ पावेल डुरोभको गिरफ्तारी रहस्यमय हुँदै गएको छ । मिडिया रिपोर्टका अनुसार उनकी २४ वर्षीया प्रेमिका युलिया भाभिलोभा डुरोभ पक्राउ परेदेखि बेपत्ता छिन् । 

अहिले डुरोभ युलियाको कारण पक्राउ परेको बताइएको छ । उनी डुरोभसँग निजी जेटमा अजरबैजानबाट पेरिस पुगेकी थिइन् । अचम्मको कुरा फ्रान्समा डुरोभविरुद्ध १२ वटा मुद्दा दर्ता भएका थिए । यसपछि पनि उनी त्यहाँ गए । 

युलियाका कारण डुरोभलाई पक्राउ गरिएको सामाजिक सञ्जालमा दाबी गरिएको छ । वास्तवमा जब दुवै पेरिस पुगे युलियाले डुरोभको निजी जेटबाट धेरै इन्स्टा स्टोरीहरू पोस्ट गरिन् । यसका कारण प्रहरीले थाहा पाएर डुरोभलाई पक्राउ गरेको बताइएको छ ।

युलिया, डुरोभ जस्तै, रुसी मूलकी हुन् । आफूलाई क्रिप्टो ट्रेनर भन्ने युलिया दुई वर्षदेखि दुबईमा बस्दै आएकी थिइन् । चार महिनाअघि डुरोभको सम्पर्कमा आएकी युलिया रुसी, अङ्ग्रेजी, अरबी र स्पेनिश लगायतका भाषा जान्ने दाबी गरिएको छ । 

दुवै काजखस्तान, कीर्गिस्तान र अजरबैजानलगायत धेरै ठाउँमा सँगै देखिएका थिए । उनका केही तस्विरहरु सामाजिक सञ्जालमा पनि आएका छन् । डुरोभको गिरफ्तारी पछि युलियाको कुनै पत्ता लागेको छैन । 

जसका कारण डुरोभ हनिट्र्यापको सिकार भएको सामाजिक सञ्जालमा दाबी भइरहेको छ । उनलाई गिरफ्तार गर्नका लागि मात्र युलिया उनीसँग नजिक भइन् र उनलाई पेरिस लगिन् । यदि डुरोभ दोषी ठहरिएमा उनले २० वर्षको जेल सजाय भोग्नुपर्नेछ ।

डुरोभलाई शनिबार (२४ अगस्त) बाल यौन दुर्व्यवहार सामग्री आदानप्रदान गर्ने माध्यमको रूपमा टेलिग्राम प्रयोग गरेको, लागुऔषध ओसारपसार र संगठित अपराध प्रवर्द्धन गर्ने र सूचना साझा गर्न असफल भएको आरोपमा पक्राउ गरिएको थियो । 

रुसका जुकरबर्ग भनिने डुरोभले २२ वर्षमा सामाजिक सञ्जाल एप बनाएका थिए ।

रुसी मूलका डुरोभले २०१३ मा आफ्नो भाइसँग टेलिग्राम स्थापना गरेका थिए । रुसी सरकारले उनीसँग रुसी जनतासँग सम्बन्धित डाटा मागेको थियो जसका कारण उनले सन् २०१४ मा देश छोडेर सेन्ट किट्स एन्ड नेभिसको नागरिकता लिएका थिए ।

शुरुका केही वर्षहरूमा डुरोभ धेरै देशहरूमा यात्रा गरे । तिनीहरूले २०१७ मा दुबईमा आफ्नो मुख्यालय स्थापना गरे । डुरोभले २०२१ मा फ्रान्सेली नागरिकता प्राप्त गरे । यद्यपि उनको गिरफ्तारी नभएसम्म युएई उनको निवासको आधार थियो । 

अल जजीराका अनुसार डुरोभसँग यूएईको नागरिकता पनि छ । त्यसैले उनले यस विषयमा नजिकबाट नजर राखिरहेका छन् । यूएईले फ्रान्सलाई सबै कन्सुलर सेवा उपलब्ध गराउन आग्रह गरेको छ । 

५ सन्तानका पिता, १०० भन्दा बढी बालबालिकाका जैविक पिता डुरोभको कुल सम्पत्ति १५.५ बिलियन डलर रहेको अनुमान गरिएको छ । उनी अर्बपतिको सूचीमा १२०औं स्थानमा छन् । रिपोर्टमा डुरोव विवाहित नभएको तर विभिन्न महिलाबाट ५ सन्तान रहेको दाबी गरिएको छ । जो आफ्ना आमासँग बस्छन् ।

रुसी मिडिया वेबसाइटले दारिया बोन्डारेन्को उनको पहिलो पत्नी भएको दाबी गरेको छ, जसबाट उनका २ सन्तान छन् । दारिया र डुरोभको डिभोर्स भएको बताइएको छ ।

यसै वर्षको जुलाईमा एक रुसी महिला इरिना बोल्गरले आफू डुरोभका तीन सन्तानकी आमा भएको दाबी गरेकी थिइन् । उनका अनुसार उनी र उनका छोराछोरी स्वीट्जरल्याण्डमा बस्छन् । यद्यपि डुरोभले यसबारे टिप्पणी गरेक छैनन् । 

डुरोभले जुलाई २९ मा आफूसँग १०० भन्दा बढी जैविक सन्तान रहेको दाबी गरेर सबैलाई चकित पारेका थिए । उनले विगत १५ वर्षदेखि शुक्रकीट दान गर्दै आएको बताए ।

टेलिग्राममा एन्ड टु एन्ड इन्क्रिप्सन पूर्वनिर्धारित रूपमा सेट गरिएको छैन, यो सुविधा अन गर्नुपर्छ । टेलिग्राम च्याटहरू पहुँच गर्न सकिन्छ । यो सुविधा व्हाट्सएपमा पूर्वनिर्धारित रूपमा सेट गरिएको छ । 

टेलिग्रामका विश्वभर एक अर्ब प्रयोगकर्ता छन् । यो केवल ३० कर्मचारीहरुद्वारा संचालित छ । डुरोभले टेलिग्रामलाई एक–व्यक्ति शो जस्तै चलाउने गरेको बताइएको छ ।