कास्की । गण्डकी प्रदेशका मुख्यमन्त्री सुरेन्द्रराज पाण्डेले पदयात्राका लागि नेपालको हिमाली क्षेत्र उत्कृष्ट भएको बताएका छन् । पदयात्रा गर्न विदेशी पर्यटकलाई आकर्षित गर्न आवश्यक भएको उनले बताए । 

नेपाल पर्वतारोहण सङ्घअन्तर्गत अन्तर्राष्ट्रिय पर्वतीय सङ्ग्रहालय पोखराद्वारा ४५औँ विश्व पर्यटन दिवसका अवसरमा शनिबार आयोजित रुसी नागरिक युरी रोडिचेभद्वारा खिचिएका हिमालको फोटो प्रदर्शनी एवं पुस्तक सार्वजनिक कार्यक्रममा मुख्यमन्त्री पाण्डेले हिमाली क्षेत्रको महत्त्व विश्वभर प्रचारप्रसार गर्न जरुरी भएको उल्लेख गरे ।

जलवायु परिवर्तनकै कारण नेपालका हिम शृङ्खलामा हिउँ पग्लिने क्रम बढिरहेको उल्लेख गर्दै उनले जलवायु परिवर्तनको असरलाई कम गरी हिमालहरूको संरक्षण गर्नतर्फ सरकार र पर्यटन सम्बद्ध संस्थाले ध्यान दिन जरुरी भएको बताए । 

अन्तर्राष्ट्रिय पर्वतीय सङ्ग्रहालयको विकास र प्रवर्द्धनमा आफूले सक्दो सहयोग गर्ने उनले प्रतिबद्धता व्यक्त गरे  “अधिकाशं विदेशी पर्यटक हिमाली क्षेत्रको पदयात्राकै लागि नेपाल आउने गरेकाले यहाँको पदमार्गको प्रचारप्रसार विदेशमा गर्न जरुरी छ,” मुख्यमन्त्री पाण्डेले भने । 

रुसी नागरिक रोडिचेभले २१ वर्षको समय खर्चिएर नेपालका हिमाली क्षेत्रको तस्बिर खिचेर रुसका विभिन्न ठाउँमा प्रदर्शन गरी त्यहाँका आठ करोड जनतालाई नेपालका हिमालका बारेमा जानकारी दिएकामा मुख्यमन्त्री पाण्डेले उनको प्रशंसा गरे ।

नेपालका हिमालको महत्त्व नेपालीले भन्दा पनि विदेशीले बुझेको उल्लेख गर्दै उनले हिमालको विदेशमा प्रचार गरी बढीभन्दा बढी पर्यटक नेपाल ल्याउन जरुरी भएको बताए । 

गण्डकी प्रदेशका उद्योग तथा पर्यटनमन्त्री मित्रलाल बस्यालले गण्डकी प्रदेश संस्कृति र प्रकृतिले धनी भएकाले यहाँ पर्यटनका सम्भावना प्रशस्त रहेको बताए।

गण्डकी प्रदेश नेपालकै उत्कृष्ट पर्यटकीयस्थल भएकाले प्रदेश सरकारले पर्यटनलाई नै पहिलो प्राथमिकतामा राखेर काम गरिरहेको उनले जानकारी दिए । 

सो अवसरमा गण्डकी प्रदेशसभा सदस्य सरस्वती गुरुङले विविधताको धनी गण्डकी प्रदेशको पर्यटन विकासमा सङ्घ र प्रदेश सरकारले ध्यान दिन जरुरी भएको बताइन् ।

गण्डकी प्रदेश नीति तथा योजना आयोगका उपाध्यक्ष डा कृष्णचन्द्र देवकोटाले जलवायु परिवर्तनको असरकै कारण हिमालहरूमा हिउँ पग्लन थालेको र त्यसलाई कसरी कम गराउन सकिन्छ भन्ने बारेमा सोच्ने बेला आएको बताए ।

कार्यक्रममा नेपाल पर्वतारोहण सङ्घका संस्थापक हरिध्वज तुलाचनले पनि आफ्नो धारणा राखेका थिए । 

रुसी नागरिक रोडिचेभले आफूले हिमालका चित्र खिच्दा निकै दुःख पाएको र अहिले ती तस्बिर हेर्दा खुसी लागेको बताए ।

चौरासी वर्षीय रोडिचेभले २१ वर्षको  समयावधिमा ३२ पटक नेपाल आएर नेपालका हिमालको तस्बिर खिचेका थिए ।

उनका एक सय ४० हिमालका चित्र पुस्तक र फोटो यहाँ सङ्ग्रहालयमा प्रदर्शनीमा राखिएका छन् ।