खसीबोकाको बिक्री अपेक्षित भएन, मारमा किसान [३२ तस्बिरमा]

हाम्रा कुरा

प्रकाशित २०८१ असोज २४ बिहिबार

काठमाडौँ । काठमाडौँ उपत्यकामा खसीबोकाको बिक्री अपेक्षित नभएको पाइएको छ । बिक्री उल्लेख्य नभएपछि किसान एवं साना व्यापारीहरुले आफूहरु पीडित भएको बताएका छन् ।

काठमाडौँ उपत्यकाका सडकमा थोरै स्थान पाउन बित्तिकैसमेत खसीबोका बिक्री गर्न राखिएका देखिन्छन् । त्यतिमात्र होइन ठूलोमात्रामा खाली चौर वा डाँडातिर पनि बिक्रीका लागि राखिएका छन् । यद्यपि बिक्री भने कम भएको छ ।

खोटाङका रामप्रसाद बस्नेतले ठूलो रकम खर्च गरेर खसीबोका काठमाडौँमा ल्याएको तर सोचेअनुसारको बिक्री नभएपछि मारमा परेको बताएका हुन् ।

उनले खर्चले नधान्ने भएपछि कृषक र आफूजस्ता साना ब्यापारी मर्ने अवस्था आएकोसमेत दुःखेसो पोखेका छन् ।

उनले सोचेअनुसार ब्यापार नभएपछि यसपालिको दशैँ खल्लो भएकोसमेत बताएका छन् ।

त्यस्तै दार्चुलाबाट भेँडा लिएर आएका रमेश सार्कीले पनि भेँडाको ब्यापार सोचेअनुसार नभएको बताएका छन् । उनले भेँडा काठमाडौँसम्म लाउन वर्षा र बाटोले गर्दा एकदम गाह्रो भएको तर बिक्री कम हुँदा भने घाटामा गएको बताएका छन् ।

उनले भेँडा ल्याउँदा धेरै रकम खर्च भएको तर काठमाडौँमा मूल्य पाउन नसकेको गुनासो गरे । सुकेधारा र धुम्बाराहीका डाँडाभरी यतिबेला खसीबोका, भेँडाहरु पाइन्छन् । च्याङ्ग्रा पनि देखिन्छन् । तर बिक्री कम भएको छ ।

बिक्री हुँदै नभएको भने होइन । तर व्यापारीले सोचेअनुसारको बिक्री नहुँदा र यथोचित मूल्य नपाउँदा भने उनीहरु निराश देखिएका हुन् ।

दशैँका बेलामा झण्डै ५४ हजार खसीबोका, च्याङ्ग्रा र भेँडा बिक्री हुने अनुमान रहँदै आएको छ ।

खाद्य संस्थानको कार्यालयले पनि गत आइतबारबाट बुधबारसम्म गरी चार दिन थापाथलीबाट खसीबोका र च्याङ्ग्रा बिक्री गरेको थियो ।