काठमाडौँ । शनिबार बडादशैँको मुख्य दिन । गत असोज १७ गते घटस्थापना गरिएसँगै शुरु भएको नवदुर्गाको पूजा शुक्रबार विशेष दिन परेको छ । शुक्रबार महाअष्टमी र महानवमी एकै दिन परेकाले पनि नवदुर्गा भगवतीको विशेष पूजा आराधना गरी मनाइँदैछ ।
देशभरका शक्तिपीठहरुमा दर्शनार्थीहरुको भीड रहेको छ । बलि दिनेहरुका लागि पनि एक दिनमात्र रहेकाले भीड बढेको छ ।
महानवमीका दिनमा गरिने दुर्गा पूजा लगायतका कार्य गरी घटस्थापनाका दिनमा राखिएको जमरा विभिन्न शक्तिपीठमा लगेर चढाइन्छ । दशैँघर र कोतलगायत राज्यका विभिन्न देवी मन्दिर र शक्तिपीठमा बोका, हाँस, कुखुरा र राँगाको बलिसहित दुर्गा भवानीको विशेष पूजा आराधना र दुर्गा सप्तशती (चण्डी), श्रीमद्भागवत एवं देवी स्तोत्र पाठ गरिन्छ ।
सात्विक अर्थात् पशुबलि नदिने र शाकाहारीहरुले महानवमीका दिनमा कुभिन्डो, घिरौँला, मुला, काँक्रो र जटा नरिवलसमेत बलि दिई पायस पनि चढाउने गर्दछन् । अधिकांश स्थानमा महाष्टमीको दिनमा बलि दिने चलन रहेको छ।
कतिपय शक्तिपीठमा भने आज हाँस, कुखुरा, बोका, भेडा र राँगाको पञ्चबलि पनि दिने गरिन्छ ।
शुक्रबारै आफूले चढ्ने सवारी साधनकोसमेत पूजा गरिन्छ । विशेषगरी बडादशैँको नवमीमा सवारीसधानको पूजा गर्ने चलन छ ।
