राणा भन्छन् : गाँठो फुकाउन ‘अलेक्जेन्डरको तरवार’ चाहियाे

चुनावको बाधक एमाले

प्रकाशित मिति : २०७३ पौष ५ मंगलबार

भक्तपुर । राष्ट्रिय प्रजातन्त्र पार्टीका राष्ट्रिय अध्यक्ष पशुपति शम्शेर राणाले प्रमुख विपक्षी एमाले वर्तमान राष्ट्रिय संकट निवारणको बाधक भएको बताएका छन् । रफत सञ्चार क्लबको साक्षात्कारमा बोल्दै राणाले स्थानीय निकाय निर्वाचन लामो समयसम्म हुन नसकेको र तोकिएको मिती नजिकिँदै गर्दा एमालेले अवरोध गरेकै कारण निर्वाचन ओझेलमा पर्दै गएको समेत बताए ।

राणाले भने,  ‘सीमाकङ्कनबारे प्रमुख तीन दलले विगतमा गरेका सहमति भुल्दै एमाले गर्दै आएको सदन र सडक अवरोध उल्टो भूमिका हो । सीमाङ्कनको विवादले  देशमा थप संकट भित्रिएको छ ।’ नेता राणाले निर्वाचन तोकिएको समयमा नभए देशले संवैधानिक संकट व्यहोर्नु पर्ने जिकिर गरे ।

सरकारले एमाले वा मधेस केन्द्रित दल जसको माग सम्बोधन गरे पनि समस्या समाधान नहुने र मुलुक थप संकटतर्फ गइरहेको राणाको तर्क छ । राणाले भने, ‘वर्तमान समस्याको गाँठो फुकाउन ‘अलेक्जेन्डरको तरवार’ जादु आवश्यक छ ।’

अध्यक्ष राणाले सीमाङ्कनको विषयमा आफ्नो पार्टीको धारणा पहिल्यै आइसकेको र संशोधनबारे पार्टीलाई समेत जानकारी नदिएको भन्दै ५ नम्बर प्रदेशमा भएको आन्दोलनमा आफ्नो पार्टीको कुनै सहानूभुती नभएको प्रस्ट्याए ।

राणाले संविधान संशोधनमा घुमाउरो पारामा जुनसुकै भाषा सरकारी कामकाजको भाषा हुने भन्ने विषयमा सहमत नभएको र राप्रपाले पहिले नै तराईमा दुई प्रदेश हुनु पर्दछ भन्ने धारणा राखेको बताए ।

संसदबाट हिन्दुराज्य घोषणाको माग सम्बोधन गर्न सक्ने वातावरण नभएकाले जनम संग्रहमा जानुपर्ने तर्क गरे । अध्यक्ष राणाले महाधिवेशनपछि आन्दोलन गर्ने चेतावनी समेत दिएका छन् । पार्टीको एकतापछि करिब ६० जिल्लामा एकिकरण भइसकेको र बाँकी जिल्लामा छिट्टै एकिकरण हुने नेता राणाको भनाई छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ