पोखरा । पोखरा पर्यटन परिषद्ले आठ हजार मिटरभन्दा बढी उचाइका १४ वटा हिमाल सफल आरोहण गरेका तेजन गुरुङलाई पोखरामा सम्मान गरेको छ ।
पोखरामा आयोजित एक कार्यक्रममा पोखरा महानगरपालिकाका प्रमुख धनराज आचार्य, पोखरा पर्यटन परिषद्का अध्यक्ष तारानाथ पहारीले संयुक्त रुपमा उनलाई सम्मान गरेका हुन् ।
सो अवसरमा मेयर आचार्यले गण्डकी प्रदेशले पर्वतीय पर्यटनका धेरै सम्भावना बोकेको बताए । आरोही गुरुङले हिमाल आरोहणमार्फत गरेको कीर्तिमानी पोखरासहित समग्र राष्ट्रकै लागि गौरवको विषय भएको उनले स्पष्ट पारे ।
परिषद्का अध्यक्ष तारानाथ पहारीले पदयात्रा र पर्वतीय पर्यटनको विकासमा जोड दिँदै गण्डकी प्रदेशका हिमालमा आरोहणको क्रम बढाउनुपर्नेमा जोड दिए ।
उनले आरोहणका माध्यमबाट गुरुङले बनाएको कीर्तिमानी प्रशंसायोग्य भएको उल्लेख गरे । साथै गुरुङ आगामी दिनमा पनि महत्वपूर्ण सफलता हासिल गर्ने अध्यक्ष पहारीको विश्वास छ ।
आरोही गुरुङले विभिन्न समयमा आठ हजार मिटरभन्दा बढी उचाइका सगरमाथा, ल्होत्से, अन्नपूर्ण, मकालु, कञ्चनजङ्घा, नाङ्गा पर्वत, जि टू, जि वान, बोर्ड पिक, के टू, मनास्लु, धवलागिरि, चोयू र शिसापन्ज्म हिमाल आरोहण गरेका छन् ।
सो अवसरमा परिषद्का उपाध्यक्ष चौबहादुर गुरुङ, सचिव नारायण सुवेदीलगायतले गण्डकी प्रदेशमा पर्वतीय पर्यटनका विविध सम्भावनाबारे चर्चा गरेका थिए ।
