भुटान महिला साफको ‘सरप्राइज’ टोली बन्दै, श्रीलंकालाई हराएर सेमिफाइनल नजिक
हाम्रा कुरा
प्रकाशित २०८१ कार्तिक ५ सोमबार
471
Shares
काठमाडौँ । भुटानले काठमाडौँमा जारी सातौँ संस्करणको साफ महिला च्याम्पियनशिप फुटबलमा ‘सरप्राइज’ नतिजा निकाल्दै आएको छ । पहिलो खेलमा पाँच पटकको उपविजेता नेपाललाई पहिलो पटक गोलरहित बराबरी खेलेर सरप्राइज टोली बनेको भुटानले दोस्रो खेलमा सोमबार श्रीलंकालाई पराजित गरेको छ ।
दशरथ रंगशालामा सम्पन्न खेलमा भुटानले श्रीलंकालाई ४–१ गोल अन्तरले पराजित गरेको हो ।
भुटानका लागि डेकी लहाजोमले २ गोल गरेकी थिइन् भने नामग्याल डेमा र दोर्जी एडोनले एक एक गोल गरेकी थिइन् । त्यस्तै श्रीलंकाका लागि एक गोल थुशानी मदुशिकाले गरेकी थिइन् ।
यो जितपछि भुटानको समूह बी मा ४ अंक भएको छ र शीर्ष स्थानमा उक्लिएको छ । त्यस्तै श्रीलंकाको २ खेलमा ३ अंक रहेको छ ।
अब भुटानले समूह चरणको अन्तिम खेलमा बिहीबार माल्दिभ्ससँग खेल्ने छ भने श्रीलंकाले सोही दिन नेपालको सामना गर्ने छ ।
यो समूहको दोस्रो खेलमा केही बेरमै नेपालले माल्दिभ्ससँग खेल्दैछ । सेमिफाइनल प्रवेशका लागि कमजोर आँकिएको माल्दिभ्सलाई नेपालले हराउनै पर्ने हुन्छ ।
पहिलो खेलमा माल्दिभ्स श्रीलंकासँग पराजित भएको थियो ।
