भारतमाथि शानदार जितसहित बंगलादेश समूह विजेता बन्दै सेमिफाइनलमा, बिहीबार नेपाल र श्रीलंका खेल्ने
हाम्रा कुरा
प्रकाशित २०८१ कार्तिक ७ बुधबार
357
Shares
काठमाडौँ । बंगलादेश काठमाडौँमा जारी साफ महिला च्याम्पियनशिप फुटबलको सेमिफाइनलमा पुगेको छ । बुधबार सम्पन्न खेलमा भारतलाई ३–१ गोल अन्तरले पराजित गर्दै बंगलादेश समूह विजेता बनेर सेमिफाइनलमा पुगेको हो ।
बंगलादेशले भारत विरुद्धको खेलको पहिलो हाफमा ३–१ को अग्रता लिएको थियो भने दोस्रो हाफमा दुवै देशबाट कुनै गोल हुन सकेन र बंगलादेशले खेल जित्यो ।
बंगलादेशका लागि तोहुरा खातुनले २ गोल गरेकी थिइन् भने अफइदा खानडाकरले एक गोल गरेकी थिइन् । त्यस्तै भारतका लागि एक गोल बाला देवीले गरेकी थिइन् ।
यो जितपछि बंगलादेशको २ खेलमा ४ अंक भएको छ र समूह विजेता हुदै सेमिफाइनलमा पुगेको छ । त्यस्तै भारतको २ खेलमा ३ अंक रहेको छ र समूह ए मा उपविजेता हुँदै सेमिफाइनलमा पुगेको छ । योसँगै समूह ए मा रहेको पाकिस्तान भने समूह चरणबाटै बाहिरिएको छ ।
त्यस्तै समूह बीबाट सेमिफाइनलमा पुग्ने दुई देशको टुंगो बिहीबार लाग्नेछ । बिहीबार नेपाल र श्रीलंकाबीच तथा भुटान र माल्दिभ्स खेल्नेछन् ।
२ खेलबाट ४ अंकसहित नेपाल शीर्ष स्थानमा रहेको छ । समान ४ अंकबाटै भुटान दोस्रो स्थानमा रहेको छ भने श्रीलंका ३ अंकसहित तेस्रो तथा माल्दिभ्स अंकविहीन हुँदै पुछारमा रहेको छ ।
