भुटानको कीर्तिमानी गोलले नेपाल दबाबमा, श्रीलंकालाई कम्तीमा पाँच गोल अन्तरले हराउनु पर्ने
भुटानले माल्दिभ्समाथि गर्यो १३–०, नेपालले गरेको थियो ११-०
हाम्रा कुरा
प्रकाशित २०८१ कार्तिक ८ बिहिबार
658
Shares
काठमाडौँ । काठमाडौँमा जारी सातौँ संस्करणको साफ महिला च्याम्पियनशिप फुटबलमा भुटानले कीर्तिमानी जित हासिल गरेको छ । समूह बीको खेलमा भुटानले माल्दिभ्सविरुद्ध १३–० को कीर्तिमानी जित हासिल गरेको हो । अहिलेसम्म भुटानले यति ठूलो अन्तरको जित हासिल गर्न सकेको थिएन ।
पहिलो हाफमा ६ गोल गरेको भुटानले दोस्रो हाफमा ७ गोल गरेको हो । प्लेयर अफ द म्याच डेकी ल्हाजोम एक्लैले ५ गोल गरिन् । २० वर्षीया डेकीले श्रीलंकाविरुद्ध २ गोल गरेकी थिइन् ।
पेमा छोदेन र डेकी याङदोनले २–२ तथा नाम्ग्याल डेमा, डेकी याङदोन, छिरिङ ल्हादेन र सोनाम छोदेनले १–१ गोल गरे ।
यो जितसँगै भुटान ३ खेलमा ७ अंकसहित शीर्ष स्थानमा पुगेको छ । भुटानको गोल अन्तर १६ भएको छ । समूह विजेता बन्न नेपालले आजको खेलमा श्रीलंकालाई कम्तीमा ५ गोलको अन्तरले हराउनु पर्ने हुन्छ ।
नेपालको २ खेलमा ४ अंक र श्रीलंकाको २ खेलमा ३ अंक छ । बराबरी गर्दा वा सामान्य जितले भने नेपाल उपविजेता बन्दै सेमिफाइनलमा पुग्नेछ ।
नेपालले यसअघि माल्दिभ्सलाई ११–० ले हराएको थियो । नेपालले पहिलो पटक भुटानसँग गोलरहित बराबरी खेलेको थियो भने भुटानले श्रीलंकालाई ४–१ ले हराएको थियो ।
समूह चरणको अन्तिम खेलमा साँझ साढे ५ बजे नेपालले श्रीलंकासँग खेल्दैछ ।
अर्को समूहबाट बंगलादेश समूह विजेता तथा भारत समूह उपविजेता बन्दै सेमिफाइनलमा पुगेका छन् ।
