नेपाल समूह विजेता बन्दै सेमिफाइनलमा, श्रीलंकामाथि ६–० को जित
नेपाल अहिलेसम्मका सबै संस्करणमा अन्तिम चारमा, सेमिफाइनलमा नेपालको भिडन्त भारतसँग, भुटानले बंगलादेशसँग खेल्ने
हाम्रा कुरा
प्रकाशित २०८१ कार्तिक ८ बिहिबार
264
Shares
काठमाडौँ । नेपाल सातौँ संस्करणको महिला साफ च्याम्पियनशिपमा समूह विजेता बन्दै सेमिफाइनलमा पुगेको छ ।
दशरथ रंगशालामा भएको समूह चरणको अन्तिम खेलमा श्रीलंकामाथि ६–० को जित हासिल गर्दै नेपाल समूह विजेता बन्दै सेमिफाइनलमा पुगेको हो ।
नेपालका लागि रेखा पौडेलले २ तथा सविता रानामगर, सावित्रा भण्डारी साम्बा, अमिषा कार्की र रश्मि घिसिङले १–१ गोल गरे । सविता प्लेयर अफ द म्याच भएकी छिन् ।
यो खेलपछि नेपाल र भुटानको समान ७–७ अंक भए पनि गोल अन्तरमा नेपाल अगाडि भएसँगै नेपाल समूह विजेता तथा भुटान समूह उपविजेता बन्दै सेमिफाइनलमा पुगेको हो ।
नेपालको गोल अन्तर १७ रह्यो भने भुटानको १६ रह्यो । सेमिफाइनलमा नेपालको भिडन्त भारतसँग हुनेछ भने भुटानले बंगलादेशसँग खेल्नेछ ।
नेपालले यसअघि माल्दिभ्सलाई ११–० ले हराएको थियो भने भुटानसँग पहिलो पटक गोलरहित बराबरीमा रोकिएको थियो ।
नेपाल अहिलेसम्मका सबै संस्करणमा सेमिफाइनलमा पुगेको छ । नेपाल पाँच पटक फाइनलमा पुगेर उपविजेता भएको छ ।
सेमिफाइनल खेल आइतबार हुने भएका छन् । पहिलो सेमिफाइनल खेल बंगलादेश र भुटानबीच दिउँसो साढे १ बजे दशरथ रंगशालामा हुनेछ । त्यस्तै दोस्रो सेमिफाइनल खेल नेपाल र भारतबीच साँझ साढे ५ बजेदेखि हुनेछ ।
