मोरङ । मोरङको बेलबारीमा सम्पन्न सातौँ आरजु राइस बेलबारी अन्तर्राष्ट्रिय आमन्त्रण गोल्डकप फुटबलको उपाधि झापा ११ फुटबल क्लबले जितेको छ ।
शनिबार बेलारी ११ लक्ष्मीमार्गस्थित लक्ष्मी खेल मैदानमा भएको फाइनल खेलमा टाइब्रेकरमा सलहेस फुटबल क्लब सिराहालाई ५–३ गोल अन्तरले हराउँदै झापाले उपाधि जितेको हो ।
झापा ११ को लागि दिनेश उराव, अभिषेक गुरुङ, शौरभ लिम्बू, उत्सव राई र देवेन्द्र तामाङले एक एक गोल गरे । सलहेशका राम थापा ,आदित्य शाक्य र विप्लव गुरुङले मात्र गोल गरे ।
सलहेशका समीर तामाङको प्रहार झापाका गोल रक्षक सन्दिप लिम्बूले बचाएपछि सलहेश उपविजेता बनेको हो ।
फाइनल खेलमा मध्यान्तर अघिको ४५ मिनेट गोलरहित बराबरीमा सकिएको थियो । ५० औँ मिनेटमा सलहेश फुटबल क्लब सिराहाका अजयी मार्टिनले हेडिङ मार्फत गोल गर्दै टिमलाई १–० को अग्रता दिलाएका थिए ।
७१ औँ मिनेटमा झापाका प्रदीप बुढाथोकीले जवाफी गोल गर्दै खेल बराबरीमा पुर्याए । १–१ गोलको बराबरी पछि प्रतिस्पर्धा निर्धारित ९० मिनेटमा थप कुनै गोल नभइ टुङ्गियो ।
त्यसपछि खेलको अन्तिम निर्णय सिधै टाइब्रेकरबाट गरिएको हो । उपाधिसँगै झापा ११ ले ८ लाख नगदसहित अढाई किलो चाँदीमा दुई तोला सुन जडित ट्रफी जितेको छ ।
यस्तै उपविजेता सलहेस फुटबल क्लब सिराहाले चार लाख नगदसहित ट्रफी प्राप्त गरेको छ । फाइनल खेलको म्यान अफ द म्याच अभिषेक गुरुङ घोषित भए । उनले नगद ५ हजार सहित ट्रफि प्राप्त गरे ।
यस्तै झापाका सन्दीप लिम्बू उत्कृष्ठ गोल रक्षक, उत्सव राई उत्कृष्ठ मिड फिल्डर, सन्तोष गुरुङ उत्कृष्ठ कोच र देवेन्द्र तामाङ सर्वश्रेष्ठ खेलाडी घोषित भए । तामाङले १० हजार नगदसहित ट्रफी र अरु खेलाडीले जनही ७ हजार नगद र ट्रफी प्राप्त गरेका छन् ।
यस्तै सलहेश फुटबल क्लबका अजयी मार्टिनले सर्वाधिक गोलकर्ताको उपाधि प्राप्त गरे । उनले खेल अवधिमा पाँच गोल गरेका थिए ।
सलहेशका समीर तामाङले उत्कृष्ठ फरर्वाडको उपाधिसँगै ७ हजार नगद र ट्रफी प्राप्त गरे ।
