अवार्ड घोषणा नहुँदै बालोन डिओरमा खेलाडीले पाएको अंक सूची बाहिरियो

हाम्रा कुरा

प्रकाशित २०८१ कार्तिक १२ सोमबार

काठमाडौँ । यस वर्षको बालोन डिओर अवार्ड आज राति घोषणा हुँदैछ । सन् २०२३–२४ सिजनको उत्कृष्ट खेलाडीको प्रतिष्ठित अवार्ड आज दिन लागिएको हो ।

फ्रान्सको फुटबल फेडेरेसनले हरेक वर्ष दिने यो अवार्ड २००८ देखि पहिलो पटक लियोनेल मेस्सी र क्रिस्टियानो रोनाल्डो बाहेक तेस्रो खेलाडीले पाउँदै छन् । यसअघि २०१८ मा लुका मोड्रिच र २०२२ मा करिम बेन्जमाले पाएका थिए ।

यस वर्ष भने मेस्सी र रोनाल्डो दुवै मनोनयनमा परेका थिएनन् । गत वर्ष यो अवार्ड मेस्सीले जितेका थिए ।

अब यस वर्ष भने यो अवार्ड ब्रजिलका भिनिसियस जुनियरले जित्ने बताइएको छ । अवार्ड अगाडि खेलाडीले पाएको अंकको सूची सामाजिक सञ्जालमा भाइरल भएको छ ।

जसमा रियाल मड्रिडबाट खेल्ने भिनिसियस ६३० अंकसहित शीर्ष स्थानमा रहेको उल्लेख छ ।

त्यस्तै म्यानचेस्टर सिटीबाट खेल्ने स्पेनिश खेलाडी रोड्री ५७६ अंकसहित दोस्रो स्थानमा रहेका छन् । रियाल म्यामड्रिडबाट खेल्ने इङल्याण्डका जुडे बेलिङघम ४२२ अंकसहित तेस्रो स्थानमा रहेका छन् ।

यसको आधिकारिकताबारे स्पष्ट जानकारी नभए पनि भिनिसियसलाई यस वर्षको अवार्डका लागि सबै भन्दा प्रबल दाबेदार मानिएको छ ।

उनले गत सिजनमा रियाल मड्रिडलाई च्याम्पियन्स लिग जिताउने क्रममा १० खेलमा ६ गोल र ४ असिस्ट गरेका थिए । त्यस्तै ला लिगामा २६ खेलमा उनको २४ गोलमा योगदान थियो ।

रियाल मड्रिडले गत सिजनको ला लिगा र च्याम्पियन्स लिग दुवै जितेको थियो ।