काठमाडौँ । राष्ट्रिय स्वतन्त्र पार्टी (रास्वपा) ले आज बालुवाटारमा प्रदर्शन गर्दैछ । रास्वपाले आफ्ना सभापति रवि लामिछाने राजनीतिक प्रतिशोधका आधारमा पक्राउ परेको भन्दै प्रदर्शन गरिरहेको छ ।

रास्पवाले दुई तिहाई सरकारको राजनीतिक प्रतिशोध र दम्भको स्रोत खोज्न बालुवाटारमा नेपाल हाउसको अगाडि मध्यान्ह १२ बजेदेखि प्रदर्शन गर्ने जनाएको छ ।

यसअघि पोखरा केन्द्रित प्रदर्शन गरेको रास्वपाले अहिले काठमाडौँ केन्द्रित आन्दोलन गर्ने भने पनि सशक्त आन्दोलन गर्न अलमल गरेको छ । कार्यकर्ता फकाउँदा रास्वपा हैरान परेको छ । 

रास्वपाभित्र पनि इमानदार र बेइमान नेताहरुबीच कित्ताकाट भइरहेकोसमेत पाइएको छ । जसका कारण इमानदारको राजनीति गर्ने केही नेताहरु बौद्धिक भएकाले पनि उनीहरुले यदि रवि बेइमान हो भने बचाउनका लागि पछि लाग्दा पार्टी संगठन नै कमजोर हुने र जनतालेसमेत विश्वास नगर्ने भन्दै आलोचना गरिरहेका छन् । 

सहकारी ठगी, संगठित अपराध र सम्पत्ति शुद्धीकरणको आरोपमा पक्राउ परेका लामिछानेको पक्षमा प्रदर्शन गरिरहेको रास्वपाले आम रुपमा जनताको समर्थन पाउन नसकेपछि आन्दोलनको स्वरूप परिवर्तन गरेको देखिएको छ ।

रविलाई कास्कीबाटमात्र हैन रुपन्देही प्रहरीलेसमेत पक्राउ पुर्जी जारी गरेको छ । उनीमाथि काठमाडौँमा पनि अनुसन्धान भइरहेको छ । देशका पाँच सहकारीमा उनको ठगी प्रकरण रहेकाले सबै ठाउँबाट पक्राउ पुर्जी जारी हुने देखिन्छ । 

काठमाडौँको स्वर्णलक्ष्मी सहकारीको उजुरीको पनि अनुसन्धान
रविलाई रास्वपाले प्रतिशोधको राजनीतिका कारण पक्राउ गरिएको भने पनि उनीमाथि कारबाहीका यथेष्ट प्रमाण छन् । उनीमाथि नै अनुसन्धान गर्न गठित संसदीय छानबिन समितिलेसमेत उनलाई दोषी देखाएको थियो । 

उनीमाथि कास्की जिल्ला प्रहरीले कारबाही प्रक्रिया अगाडि बढाएसँगै गत कार्तिक २ गते पक्राउ परेपछि कार्तिक ३ देखि कास्कीमै हिरासतमा छन् । 

उनलाई त्यहाँबाट रुपन्देही जिल्ला प्रहरीले लैजानेछ । यसै क्रममा काठमाडौँ प्रहरीले पनि अनुसन्धान अघि बढाएको छ । कालिमाटीमा रहेको स्वर्णलक्ष्मी सहकारीका बचतकर्ताले दिएको उजुरीमा प्रहरीले छानबिन फेरि खुलेको हो । 

स्वर्णलक्ष्मी सहकारी रविका गोर्खा मिडिया प्रालिका साझेदार जीबी राईको हो । जीबी फरार छन् । रवि पक्राउ परेका छन् । गोर्खा मिडियाकै छविलाल जोशी पनि कास्की प्रहरीको हिरासतमा छन् । 

जीबीको उक्त सहकारीका बचतकर्ताले दानबहादुर कार्की काठमाडौं प्रहरी परिसरको प्रमुख हुँदा करिब डेढ बर्षअघि नै जाहेरी दिएका थिए । तर परिसरमा दर्ता भएको जाहेरीमा अनुसन्धान नगरी पीडितलाई थप पीडा दिइएको थियो । 

कार्कीले अनुसन्धान नगरी पेन्डिङमा राखेको स्वर्णलक्ष्मी सहकारीको रकम हिनामिनामा अहिले रविमाथि अनुसन्धान अघि बढेको हो । 

लामिछानेविरुद्ध परेको स्वर्णलक्ष्मीको जाहेरीमा मात्र होइन, तत्कालीन एसएसपी कार्कीले लामिछानेको राहदानी दुरुपयोगसम्बन्धी मुद्दा तामेलीमा राख्न सिफारिस गरेका थिए । 

राहदानी मामिला र स्वर्णलक्ष्मीदेखि पोखराको सूर्यदर्शन सहकारीका बचतकर्ताले दिएको जाहेरी नै दर्ता नगर्ने वातावरण मिलाएबापत कार्कीलाई लामिछानेले गृहमन्त्री हुँदा पहिलो वरीयतामा डीआईजी बढुवा गरेका थिए । 

रविले आफू गृहमन्त्री हुँदा प्रहरीमाथि हस्तक्षेपकारी भूमिका खेलेर सरुवा र बढुवामा निकै चलखेल गरे पनि उनी बच्ने आधार भने कतैबाट पनि देखिँदैन । अब रविलाई काठमाडौँ प्रहरीले पनि पक्राउ पुर्जी जारी गर्ने सम्भावना रहेको स्रोतले बताएको छ ।