कोशीका निवर्तमान मन्त्री अधिकारीलाई जापान जानेहरुले बुझाएका थिए १० देखि १३ लाख

हाम्रा कुरा

प्रकाशित २०८१ कार्तिक २२ बिहिबार

काठमाडौँ । कोशी प्रदेशका तत्कालीन आन्तरिक मामिला तथा कानून मन्त्री लिलाबल्लभ अधिकारीसँगै जापान पुगेका व्यक्तिहरूले ठूलो रकम बुझाएको खुलासा भएको छ ।

प्रहरीसँगको बयानमा उनीहरुले १० देखि १३ लाखसम्म रकम बुझाएको खुलेको हो । मानव तस्करीमा मुछिएपछि मन्त्री अधिकारीले बुधबार नै पदबाट राजीनामा दिएका थिए ।

मन्त्री अधिकारीसँगै उडेका तीन जना र कीर्ते कागजात बनाउनमा संलग्न तीन जना गरी ६ जनामाथि जिल्ला प्रहरी परिसर काठमाडौंले अनुसन्धान गरिरहेको छ ।

जापानको अध्यागमनले मन्त्रीसँगै गएका खोटाङका ३६ वर्षीय दावा शेर्पा, जनक राई र २२ वर्षीय कञ्चन देवकोटालाई डिपोर्ट गरेको थियो ।

उनीहरूमध्ये दुई जनाले आन्तरिक मामिला तथा कानून मन्त्रालयकै परिचय पत्र बोकेका थिए भने एक जनासँग वडा सदस्यको परिचयपत्र रहेको थियो ।

काठमाडौँ उपत्यका अपराध अनुसन्धान कार्यालयलाई अध्यागमन कार्यालयबाट पत्राचार भएपछि तीनै जनालाई पक्राउ गरेको थियो ।

प्रहरीले अहिले उनीहरुविरुद्ध कीर्ते गरेको आरोपमा अनुसन्धान गरिरहेको बताएको छ ।

उनीहरुकै बयानका आधारमा कीर्ते परिचयपत्र बनाउन सहयोग गर्ने जुगल रिजाल, वीरबहादुर सुनुवार र महेश पाण्डेलाई पनि प्रहरीले पक्राउ गरेको छ ।

प्रहरी अनुसन्धानमा यस प्रकरणमा महेश पाण्डेको भूमिका बढी देखिएको बताइएको छ । उनीहरूले पाण्डेलाई नै १० देखि १३ लाख रुपैयाँसम्म बुझाएको प्रारम्भिक बयानका क्रममा बताएका छन् ।

यस प्रकरणमा प्रहरीले अहिलेसम्म तत्कालीन मन्त्री अधिकारीलाई भने अनुसन्धानको दायरामा नराखेको बुझिएको छ । तर प्रहरीले यो विषयलाई मानव तस्करको विषयसँग जोडेर पनि अनुसन्धान गर्ने बताइएको छ ।