परिवार नियोजन सङ्घको केन्द्रीय अध्यक्षमा डा श्रेष्ठ निर्वाचित
हाम्रा कुरा
प्रकाशित २०८१ मंसिर ३ सोमबार
166
Shares
बागलुङ । नेपाल परिवार नियोजन सङ्घको केन्द्रीय अध्यक्षमा चितवनका डा राजेन्द्रबहादुर श्रेष्ठ विजयी भएका छन् ।
बागलुङबजारमा सम्पन्न ४२औँ केन्द्रीय सभामा अध्यक्ष पदमा चारजना प्रतिस्पर्धा रहेका थिए । अधिवेशनमा देशभरका २७ शाखाका प्रतिनिधि र पर्यवक्षेकको सहभागिता थियो ।
निर्वाचनको मत परिणामअनुसार डा राजेन्द्रबहादुर श्रेष्ठ र निरन्जनप्रसाद श्रेष्ठले बराबर मत प्राप्त गरेका थिए ।
श्रेष्ठ गोलाप्रथाबाट चयन भएका हुन् । दुवै जनाले १०/१० मत प्राप्त गरेको निर्वाचन अधिकृत भूमिश्वर गौतमले जानकारी दिए ।
अध्यक्षका अन्य प्रत्याशी मनोजप्रसाद उप्रेतीले पाँच र डा किरण रेग्मीले दुई मत प्राप्त गरेका थिए ।
यस्तै, कोषाध्यक्षमा निर्माणकुमार श्रेष्ठ निर्वाचित भएका छन्। प्रतिस्पर्धी जनकराज जोशीलाई दुई मतले हराउँदै श्रेष्ठ कोषाध्यक्षमा निर्वाचित भएका हुन् । श्रेष्ठले १२ मत प्राप्त गर्दा प्रतिस्पर्धी जोशीले १० र सुरेन्द्र बस्नेतले पाँच मत मात्र प्राप्त गरेका थिए ।
यस्तै, महिला सदस्यमा कमला सापकोटा र राधिका गुरुङ निर्वाचित भएको निर्वाचन अधिकृत गौतमले जानकारी दिए । दुई पदमा तीन जनाबीच प्रतिस्पर्धा भएको थियो ।
निर्वाचित सदस्यद्वयमध्ये सापकोटाले २० र गुरुङले १६ मत प्राप्त गरेको थियो भने प्रतिस्पर्धी नितु बस्नेतले १४ मत प्राप्त गरे ।
गौतमका अनुसार सङ्घको नेतृत्वका लागि विधानअनुसार अध्यक्ष, कोषाध्यक्ष, महिला सदस्य, युवा सदस्य र विशेषज्ञ सदस्य गरी नौ पदमा निर्वाचन सम्पन्न भएको थियो ।
जसमध्ये युवा सदस्यमा प्रमिला खड्का र विशेषज्ञ सदस्य पदमा भागरथी भट्ट निर्विरोध निर्वाचित भएका थिए ।
यस्तै, विशेषज्ञतर्फ यौनिक अल्पसङ्ख्याक वा अपाङ्गता भएकाबाट सजिया श्रेष्ठ, कानुनबाट चन्द्रमाया श्रेष्ठ, अर्थबाट गजेन्द्रदेव लेखक र यौन तथा प्रजनन विशेषज्ञबाट दिनेशमान सिंह प्रधान निर्विरोध निर्वाचित भएका थिए ।
