सबै पूर्वाधार अपाङ्गतामैत्री बनाउन सरकारको ध्यानाकर्षण

हाम्रा कुरा

प्रकाशित २०८१ मंसिर ९ आइतबार

पोखरा । अपाङ्ग महिला सशक्तीकरण केन्द्र कास्कीले गण्डकी सरकारका भौतिक पूर्वाधार विकास तथा यातायात मन्त्री प्रकाशबहादुर केसीलाई छबुँदे मागपत्र बुझाएको छ ।

केन्द्रको टोली आइतबार मन्त्रालयमै पुगेर मन्त्री केसीलाई अपाङ्गता भएका व्यक्तिका लागि गरिनुपर्ने छ वटा विषय समेटेर पत्र बुझाएका हुन् ।

केन्द्रकी अध्यक्ष अन्जना केसीले हस्ताक्षर गरेको पत्रमा अपाङ्गता भएका व्यक्तिका लागि पहुँचयुक्त भौतिक संरचना तथा सञ्चार सेवा निर्देशिका २०६९ अनुरुप निर्माण हुनुपर्ने र त्यसको कार्यान्वयनका लागि ८५ वटै पालिकालाई पत्रचार गरिनुपर्ने पहिलो माग गरिएको छ ।

अत्यावश्यक सेवा प्रदान गर्ने सरकारी कार्यालयलाई पहुँचयुक्त बनाउनुपर्ने, पहुँचयुक्त सार्वजनिक सवारी सञ्चालन गर्न, फुटपाथसहित सडक संरचनालाई अपाङ्गतामैत्री बनाउन, सरकारी संरचनाको पहुँचयुक्तता परीक्षण गरी सुझावअनुसार पहुँचयुक्त बनाउन र नयाँ बन्ने सबै पूर्वाधार अपाङ्गमैत्री हुनुपर्ने मागसमेत केन्द्रले गरेको छ ।

सोक्रममा मन्त्री केसीले कानूनमा भएका तर कार्यान्वयन नभएका विषयलाई कार्यान्वयन गर्न सक्दो प्रयास गर्ने बताए ।

उनले अपाङ्गमैत्री पूर्वाधार, अपाङ्गमैत्री कानून बनाउने विषयमा सरकारलाई निरन्तर झक्झाउन आग्रह गरे ।