सीमाङ्कनको बुँदा हटाइए विपक्षीले संशोधन विधेयक अघि बढ्न दिने

विधेयक फेल गराउन भगिरथ प्रयासमा एमाले, के भन्छन् टोपबहादुर र चन्द्र भण्डारी ?

प्रकाशित मिति : २०७३ पौष १९ मंगलबार

काठमाडौं । सरकारले ल्याएको संविधान संशोधन विधेयकविरुद्ध रहेका विपक्षी र सत्तारुढ दलकै नेताहरुले सीमाङ्कनको बुँदा हटाए विधेयक अघि बढ्न दिने  बताएका छन् । प्रमुख विपक्षी एमालेले अदालती आदेशको सम्मान गर्दै संसदको अवरोध खोल्ने बताएको छ । मंगलबार विहान अध्यक्ष केपी ओलीको निवास बालकोटमा बसेको एमाले स्थायी कमिटी बैठकमा अध्यक्ष ओलीले सत्ताबाहिर र सत्तामै रहेका राप्रपा र फोरम लोकतान्त्रिकलाई पनि आफैतर्फ तानेर संशोधन विधेयक फेल गराउने रणनीति सुनाएका छन् ।

एमालेले सीमाङ्कनको बुँदा फिर्ता गरिए सदनमा छलफल हुन दिने बताइसकेको छ । एमाले सचिव प्रदीप ज्ञवालीले भने, ‘संसदको अवरोध खोल्ने भनेका छौं । सरकार कसरी प्रस्तुत हुन्छ । त्यही आधारमा हामी अघि बढ्छौं ।’ तपाईहरुको मद्दा सकियो, घुँडा टेक्नु भो हैन ? जवाफमा उनले भने, ‘हाम्रो मुद्दा सकिएकै छैन । २२ गते विशाल जनप्रदर्शन हुँदैछ । सर्वोच्चले संविधान अनुसार अघि बढ्नुस् भनेर स्पष्ट भनिसकेको छ । सीमाङ्कनको विषय हटाइएन भने यो सरकार नै दुर्घटनामा पर्न सक्छ ।’ भनेको सरकार फेर्ने खेलमा लाग्नु भा हो ? उनले भने, ‘एमालेलाई सरकारको कुनै रुचि छैन । यसमा लडाई छैन । एमालेले निर्वाचन र संविधान कार्यान्वयनमा रुचि छ ।’

संविधान संशोधनको विधेयकमा रहेको सीमाङ्कनको बुँदा हटाएपनि आफुहरु विधेयकको विपक्षमै मतदान गर्ने र विधेयक फेल हुने ज्ञवालीले बताए । यद्यपि, अबको संसद बैठक चल्न दिनेमा एमाले सकारात्मक रहेको उनले बताएका छन् । संविधान संशोधन विधेयकप्रति आपत्ति जनाउँदै आएका सत्ताधारी मओवादीकै संसदीय दलका उपनेता टोपबहादुर रायमाझीले समेत सीमाङ्कनको बुँदा हटाइए सोच्न सकिने बताएका छन् ।

रायमाझले सदन चलेपनि संशोधनको विपक्षमा मतदान गर्ने बनाउँदै आएका छन् । दुई तिहाईले पारित भएको संविधानको प्रावधान विपरीत विधेयक नै ल्याउन नहुने अडान राख्दै आएका कांग्रेस नेता चन्द्र भण्डारीले सीमाङ्कनको विषय पहिले नै आउन नहुने बताए । उनले भने, ‘अब सहमतिमै संविधान अनुरुप अघि बढ्नुको विकल्प छैन । संशोधन भन्दा पनि निर्वाचन गर्नेतिर छलफल केन्द्रित हुनु पर्छ ।’ ५ वर्ष भित्रमा देश नै सिध्याउने संशोधन विधेयक छलफलमा आएपनि पास नहुने भण्डारीको भनाई छ ।

उनले भने, ‘सीमाङ्ककनको विषयमा यो संसदलाई बोल्ने अधिकार नै छैन । संविधानको आफु अनुकुल व्याख्या गरेकै कारण सर्वोच्चको व्यस्तता बढेको हो । अझ यस्तै दोहोरो अर्थ लाग्ने शब्दहरु खोज्दै बहस गर्दै गए सर्वोच्चले शब्द–शब्दको व्याख्या गर्नु पर्ने छ ।’ मैले पहिले नै हाउसमा भनेका थिए । आफु अनुकुल व्याख्या नगरौं, भण्डारीले थपे, ‘अब पनि त्यस्तै गरिन्छ भने दुर्भाग्य हो ।’

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ