काठमाडौँ । युक्रेनका राष्ट्रपति भोलोदिमिर जेलेन्स्कीले अमेरिकी राष्ट्रपति डोनाल्ड ट्रम्पसँग रक्षा, सैन्य सहयोग र युक्रेनमा जारी द्वन्द्वको वर्तमान अवस्थाबारे महत्वपूर्ण कूटनीतिक वार्ता गरेका छन्। यस कुराकानीलाई 'राम्रो बैठक' को रूपमा वर्णन गर्दै जेलेन्स्कीले एक्स (पहिले ट्विटर) मा गरेको पोस्टमा राष्ट्रपति ट्रम्पलाई हालैको इरानविरुद्धको अमेरिकी आक्रमणलाई सङ्केत गर्दै 'मध्यपूर्वमा सफल अपरेशन' को लागि बधाई दिएका छन्। उक्त अमेरिकी आक्रमणले इरानको आणविक र ड्रोन पूर्वाधारको प्रमुख उत्पादन केन्द्रलाई लक्षित गरेको थियो, जसबाट इरानका तीनवटा हतियार निर्माणस्थल ध्वस्त भएका थिए।

जेलेन्स्कीले भने, "हेगमा अमेरिकी राष्ट्रपति ट्रम्पसँग मेरो भेटवार्ता भएको छ। वार्ता सकारात्मक भयो। मैले राष्ट्रपति ट्रम्पलाई मध्यपूर्वमा सफल अभियानका लागि बधाई दिएँ। यो महत्त्वपूर्ण छ कि अमेरिकी कार्यहरूले उनीहरू (इरानी) को आणविक कार्यक्रम मात्र होइन उनीहरूको ड्रोन उत्पादन क्षमतालाई पनि कमजोर पारेको छ।"

बैठकको एउटा मुख्य विषय भनेको रुसी क्षेप्यास्त्र र ड्रोन आक्रमणलाई निरन्तरता दिँदै युक्रेनले आफ्नो हवाई प्रतिरक्षा प्रणालीलाई बलियो बनाउनु थियो। जेलेन्स्कीले युक्रेनले आफ्ना शहर, महत्त्वपूर्ण पूर्वाधार, चर्च र नागरिक जनसङ्ख्याको सुरक्षाको लागि अमेरिकामा निर्मित हवाई रक्षा प्रणालीहरूको खरीदलाई सक्रिय रूपमा जोड दिइरहेको र यस प्रयासमा युरोपेली व्यापक सहयोगका लागि पनि आग्रह गर्ने बताएका छन्।

दुई नेताले अमेरिका र युक्रेनबीच ड्रोनको सह-उत्पादनको सम्भाव्यताबारे पनि छलफल गरेका छन्, जसले किएभलाई आफ्नो घरेलु रक्षा उद्योगलाई बढाउन र पश्चिमी सुरक्षा आपूर्ति शृङ्खलामा योगदान पुर्याउन मद्दत गर्नेछ।

भेटमा युक्रेनका राष्ट्रपतिले इस्तानबुलमा हालै सम्पन्न प्राविधिक बैठकका बारेमा पनि ट्रम्पलाई जानकारी गराएका थिए। इस्तानबुलमा कैदीहरूको आदानप्रदान र मृतकहरूको स्वदेश फिर्तीलगायतका मानवीय मुद्दाहरूमा छलफल भएको थियो। जेलेन्स्कीले रुसले आफ्ना केही सैनिकको शव हस्तान्तरण गरेको र किएभमा अहिले फरेन्सिक परीक्षण भइरहेको जानकारी दिए।

जेलेन्स्कीले युद्धभूमिमा भएको पछिल्लो घटनाक्रमबारे पनि ट्रम्पलाई जानकारी गराएका थिए। उनले रुसी राष्ट्रपति भ्लादिमिर पुटिनले दाबी गरेको प्रगतिको खण्डन गर्ने तथ्यात्मक विवरण प्रस्तुत गरे। "हामीले युद्धभूमिको अवस्थाबारे कुरा गर्यौं। पुटिनले पक्कै पनि जितिरहेका छैनन्। मैले राष्ट्रपतिलाई वास्तवमा धरातलमा के भइरहेको छ भन्ने तथ्यहरू उहाँसामु प्रस्तुत गरेँ," जेलेन्स्कीले भने।

"बैठक र तपाईंको समर्थनको लागि धन्यवाद। म हाम्रा नागरिकहरूको बारेमा साँच्चिकै दयालु शब्दहरूको लागि पनि आभारी छु। युक्रेन र रुसबीच जारी द्वन्द्वको पछिल्लो घटनाक्रमलाई ध्यानमा राख्दै हामी सहकार्य गरिरहनेछौं," जेलेन्स्कीले थपे।

यसैबीच, मङ्गलबार दक्षिणपूर्वी युक्रेनमा मस्कोले गरेको क्षेप्यास्त्र आक्रमणमा १७ जनाको मृत्यु हुनुका साथै २०० भन्दा बढी व्यक्ति घाइते भएका छन्। रुसले सीमा क्षेत्र भोरोनिशलगायत विभिन्न क्षेत्रमा रातारात दर्जनौं ड्रोनलाई रोकेको र रुसी सेनाले पूर्वी युक्रेनको डोनेट्स्क क्षेत्रको डायलिभ्का गाउँलाई नियन्त्रणमा लिएको घोषणा गरेको छ।

यसैबीच, नेटोका सदस्य राष्ट्रहरूले सन् २०३५ सम्ममा आफ्नो देशको कुल गार्हस्थ्य उत्पादनको पाँच प्रतिशत रक्षा र सुरक्षासँग सम्बन्धित 'मुख्य प्रतिरक्षासम्बन्धी आवश्यकता' का क्षेत्रमा लगानी गरी आफ्नो सैन्य क्षमता अभिवृद्धि गर्ने प्रतिबद्धता व्यक्त गरेका छन्।