काठमाडौँ । गत मंगलबार बिहान नेपाल–चीन सीमामा पर्ने लेन्डेखोला (भोटेकोशी) मा आएको बाढीले रसुवाको जनजीवन अस्तव्यस्त भएको छ । हराइरहेका कयौँ अझै फेला परेका छैनन् । ठूलो जनधनको क्षति भएको छ ।
जलविद्युत गृहहरु ध्वस्त भएका छन् । स्याफ्रुबेसी टिमुरे सडक पूर्णरुपमा अवरोध भएको छ । ठाउँ ठाउँमा गएको पहिरोका कारण सवारी साधन चलाउन र पैदल यात्रा गर्न समेत कठिन भएको छ ।
गोसाइँकुण्ड गाउँपालिका ३ लिङलिङमा सडक बाढीले बगाउँदा सो क्षेत्रमा जोखिम मोलेर यात्रा गर्नु पर्ने अवस्था रहेको छ ।
नेपाली सेना, प्रहरी र सशस्त्र प्रहरीले ठाउँ ठाउँमा बाटो बनाउने काम गरेता पनि सवारी साधनका लागि भने सडक कहिले खुल्ने टुंगो छैन ।
नेपाल चीन जोड्ने प्रमुख सडक अवरोध हुँदा काठमाडौँ उपत्यका प्रवेश गर्ने सयौ मालबाहक सवारी साधनहरु टिमुरे मै थन्किएका छन् ।
ल्हेन्दे खोलाको बाढीले रसुवागढीमा चीनबाट आयात भई भन्सार पास गर्न बाँकी बाढीबाट जोगिएका सवारीसाधन अलपत्र अवस्थामा छन् ।
त्यस्तै ल्हेन्दे खोलाको बाढीले रसुवागढी हाइड्रोको पावर हावस जाने बेलिब्रिज जोखिममा परेको छ ।
ल्हेन्दे खोलाको बाढीले सवारीसाधन कच्याक कुचुक परेका छन् ।
