काठमाडौँ। राष्ट्रिय युवा सांसदको आयोजनामा बिहीबार काठमाडौँमा सम्पन्न राष्ट्रिय युवा सांसद शपथ ग्रहण समारोहमा देशभरका १६५ युवा सांसदले पद तथा गोपनीयताको शपथ लिएका छन्। ग्लोबल युथ पार्लियामेन्टका अध्यक्ष दिवाकर अर्यालले देशका विभिन्न निर्वाचन क्षेत्रको प्रतिनिधित्व गर्ने यी युवा सांसदहरूलाई शपथ ग्रहण गराएका हुन्।
समारोहमा प्रमुख अतिथि कुलमान घिसिङले बत्तीको उज्यालोले मात्रै देश समृद्ध नहुने भन्दै स्वास्थ्य, शिक्षा, पूर्वाधार, कृषिलगायतका क्षेत्रमा पनि उज्यालो आवश्यक भएकोमा जोड दिए।
नेपाल उद्योग वाणिज्य महासङ्घका पूर्वअध्यक्ष भवानी राणाले राष्ट्र निर्माणका लागि सम्झौता गर्नुपर्नेमा जोड दिँदै सांसदहरू देश बनाउनका लागि क्रियाशील रहनुपर्ने बताइन्।
क्याप्टेन विजय लामाले कुनै पनि पद वा बर्दी नक्कली हुन नसक्ने उल्लेख गर्दै पद र बर्दी ओगट्ने व्यक्तिहरू नक्कली हुँदा देश र जनताले दुःख पाएको धारणा व्यक्त गरे।
कार्यक्रममा नवनिर्वाचित युवा सांसदहरूलाई ग्लोबल युथ पार्लियामेन्टका अध्यक्ष दिवाकर अर्याल, सांसद छनोट प्रक्रियाका निर्णायक बुद्धिसागर मरासिनी र सञ्चारकर्मी राजन कुइँकेलले प्रमाणपत्र तथा ब्याच वितरण गरे।
कार्यक्रमको दोस्रो सत्रमा पूर्वराजदूत महेशराज दाहाल र अधिवक्ता रामहरि नेपालले नवनिर्वाचित युवा सांसदहरूलाई कानुन निर्माण प्रक्रिया र संसदीय अभ्यासबारे प्रशिक्षण प्रदान गरे। यस अवसरमा नागरिक समूहका अध्यक्ष निगम हुमागाई, नेपाल–चीन मामलाका जानकार दिनेश खनाल, समाजसेवी विष्णुहरि दाहाल, युवा अभियन्ता विजय कँडेल लगायतको उपस्थिति थियो।
युवा सांसद छनोटका लागि देशभरका १६५ निर्वाचन क्षेत्रका लागि अनलाइनमार्फत खुला आवेदन आह्वान गरिएको थियो। प्राप्त सात हजारभन्दा बढी आवेदनहरूमध्ये उनीहरूको अध्ययन, समाजप्रतिको योगदान तथा कामको अनुभवका आधारमा प्रत्येक निर्वाचन क्षेत्रका लागि अन्तिम तीन उम्मेदवार चयन गरिएको थियो। तीमध्ये एक-एक जना असार १५ गते भएको अनलाइन भोटिङबाट निर्वाचित भएका हुन्।
सांसद छनोट समितिमा पूर्वराजदूत महेशराज दाहाल, रक्षा नेपालकी अध्यक्ष मेनुका थापा, पत्रकार बुद्धिसागर मरासिनी, अधिवक्ता रमण कर्ण, समाजसेवी बिन्दु परियार थापा, अर्थविद् नवराज अर्याल र ग्लोबल युथ पार्लियामेन्टका उपाध्यक्ष कैलाश श्रेष्ठ रहेका थिए।
