हेटौडा। कानून बमोजिम मकवानपुरको हेटौंडाको सडक फराकिलो पार्ने अभियानमा अडिक रहेर काम गरिररहेका क्षेत्रीय प्रशासक विनोद केसीलार्इ सरुवा गरिएको छ । उनीसँगै सरकारले सहायक प्रमुख विश्वप्रकाश सुवेदीलार्इ पनि सरुवा गरिएको छ । मध्यमाञ्चल क्षेत्रीय प्रशासकको रुपमा हेटौडामा आएदेखि नै सडक विस्तारको कामलार्इ निडर ढंगले अघि बढाइरहेका केसीलार्इ सार्वजनिक खरिद अनुगमन कार्यालय काठमाडौंमा सरुवा गरिएको हो ।
केसीलाइ सार्वजनिक खरिद अनुगमन कार्यालयमा सरुवा गरेसँगै सरकारले शम्भु कोइरालालाई सचिवमा बढुवा गरी मध्यमाञ्चल क्षेत्रीय प्रशासन कार्यालय हेटौँडाको प्रमुखको रुपमा पठाएको छ । सरुवा भएका मध्यमाञ्चल क्षेत्रीय प्रशासक विनोद केसी २५ मिटर फराकिलो पार्ने अभियानको प्रमुख मानिन्छन् । उनले अडिक रुपमा सडक विस्तारको काम गरेपछि राजनीतिक दबाबको आधारमा उनीमाथि कारबाही गरिएको स्रोतको दाबी छ ।
यसैबीच निवर्तमान प्रमुख केसीले यो नियमित प्रक्रिया रहेको भन्दै जो आएपनि सडक विस्तारको काम नरोकिने बताएका छन् । सरुवाको खबर पाएपछि हाम्राकुरासँग कुराकानी गर्दै केसीले यस्तो बताएका हुन् । यद्यपि उनले अहिलेसम्म सरुवाकाे पत्र भने नपाएकाे बताएका छन् ।
