काठमाडौँ। यस वर्ष फिलिपिन्सलाई प्रत्यक्ष असर पार्ने सबैभन्दा शक्तिशाली आँधी सुपर टाइफुन फङ–वोङ (स्थानीय नाम: उवान) आइतबार देशको उत्तर–पूर्वी तटमा विनाशकारी हावा र मुसलधारे वर्षाका साथ प्रहार गर्न थालेको छ। तीव्र गतिका कारण देशभर बिजुली अवरुद्ध भएको छ भने करिब १० लाख मानिसलाई सुरक्षित स्थानमा सार्न बाध्य बनाएको छ।

फङ–वोङले दक्षिणपूर्वी एसियाली द्वीपसमूहको करिब दुई–तिहाइ भू–भागलाई प्रभावित गर्ने सम्भावना छ। यो आँधी फिलिपिन्स पुग्नुअघि नै, देश भर्खरै गएको टाइफुन कलमेगी ले पारेको व्यापक विनाशसँग जुधिरहेको थियो, जसले गत मङ्गलबार देशका मध्य प्रान्तहरूमा कम्तीमा २२४ जनाको ज्यान लिएको थियो। राष्ट्रपति फर्डिनान्ड मार्कोस जुनियरले कलमेगीको विनाश र फङ–वोङबाट हुनसक्ने सम्भावित क्षतिका कारण राष्ट्रव्यापी आपतकाल घोषणा गर्नुभएको छ।

फिलिपिन्स मौसम विभागका अनुसार फङ–वोङले आइतबार दिउँसोसम्म पूर्वी क्याटान्डुआनेस प्रान्तको पान्डान सहर नजिक तटीय क्षेत्रमा प्रवेश गरेको अनुमान गरिएको छ। १८५ किलोमिटर प्रतिघण्टा को निरन्तर हावा र २३० किलोमिटर प्रतिघण्टासम्मका झोकासहितको यो आँधी उत्तरपश्चिम दिशातर्फ सर्दै आइतबार बेलुका वा सोमबार बिहान अरोरा वा इसाबेला प्रान्तको तटमा अवतरण गर्न सक्ने बताइएको छ।

रक्षा मन्त्रालयका प्रमुख गिल्बर्टो टिओडोरो जुनियरले फङ–वोङ अत्यन्त शक्तिशाली रहेको र यसको प्रभावले कलमेगीले तहसनहस पारेका मध्य प्रान्तहरू, सेबू र राजधानी क्षेत्र महानगरीय मनिलासहित देशको विशाल भू–भागलाई असर गर्न सक्ने भन्दै नागरिकहरूलाई सचेत रहन आग्रह गरेका छन्। नागरिक सुरक्षा कार्यालयका अनुसार तीन करोडभन्दा बढी मानिस प्रत्यक्ष रूपमा फङ–वोङको खतरामा पर्न सक्ने सम्भावना छ।

बाढी र माटोको बहावको अत्यधिक जोखिम रहेका, विशेषगरी बिकोल प्रान्तका तटीय गाउँहरूबाट अधिकारीहरूले नौ लाख १६ हजारभन्दा बढी नागरिकलाई सुरक्षित स्थानमा सारिसकेका छन्। रक्षामन्त्री टिओडोरोले बाढी सुरु भएपछि उद्धार कार्य निकै कठिन हुने भएकाले उच्च जोखिमका क्षेत्रका बासिन्दालाई तुरुन्तै सुरक्षित ठाउँमा सर्न आग्रह गरेका छन्।

फङ–वोङ नजिकिँदै गर्दा देशका धेरै पूर्वी सहर र गाउँहरूमा बिजुली आपूर्ति पूर्ण रूपमा बन्द भएको छ। हावा र वर्षाको तीव्रताका कारण धेरै स्थानमा सम्पर्क र सञ्चार अवरुद्ध भएकोले उद्धार र राहत कार्य कठिन बनेको छ। उत्तरी प्रान्तका अधिकारीहरूले सोमबार र मङ्गलबार विद्यालय र सरकारी कार्यालयहरू बन्द गर्ने आदेश दिएका छन्। सप्ताहन्त र सोमबारसम्म ३२५ आन्तरिक र ६१ अन्तर्राष्ट्रिय उडानहरू रद्द भएका छन् भने तटरक्षकले जहाजहरूलाई समुद्रमा जान निषेध गरेपछि १०९ बन्दरगाहहरूमा छ हजार ६०० भन्दा बढी यात्रु र कर्मचारीहरू फसेका छन्।