फिलिपिन्समा दुई शक्तिशाली आँधीको कहर: दुई सय पचास जनाको मृत्यु
लाखौं विस्थापित
हाम्रा कुरा
प्रकाशित २०८२ कार्तिक २६ बुधबार
2k
Shares
काठमाडौँ। गत हप्तामा लगातार दुई शक्तिशाली आँधीका कारण फिलिपिन्समा मृत्यु हुनेको सङ्ख्या दुई सय पचास पुगेको छ भने लाखौं मानिसहरू विस्थापित भएका छन्।
अधिकारीहरूले मङ्गलबार दिएको जानकारी अनुसार, नोभेम्बर ४ मा आएको कालमेगी आँधीले मध्य फिलिपिन्समा ठूलो बाढी र पहिरो निम्त्याउँदा २३२ जनाको मृत्यु भएको छ भने ११२ जना बेपत्ता भएका छन्।
कालमेगी आँधीबाट मृत्यु हुनेहरूको ठूलो सङ्ख्या सेबु प्रान्तमा रहेको छ, जुन सेप्टेम्बर ३० मा गएको ६.९ म्याग्निच्युडको भूकम्पबाट अझै पनि पीडित छ।
मङ्गलबार नागरिक रक्षा कार्यालयले दिएको जानकारीमा आइतबार लुजोन टापुमा ठोक्किएको सुपर टाइफुन फङ-वङले पनि कम्तीमा १८ जनाको ज्यान लिएको उल्लेख छ। यी दुई आँधीले लाखौं बासिन्दाहरूलाई विस्थापित गर्नुका साथै घर, खेतबारी र सडक तथा पुलहरू सहितका प्रमुख पूर्वाधारहरू ध्वस्त पारेको अधिकारीहरूले बताएका छन्।
फङ-वङ यस वर्ष फिलिपिन्समा आएको २१औँ उष्णकटिबंधीय आँधी हो, जसले देशको वार्षिक औसत २० वटा आँधीको सङ्ख्यालाई उछिनेको छ।
