निर्माणाधीन संघीय संसद भवन समयमै सम्पन्न गर्न निर्देशन [भिडियो]
तीन वर्षमा निर्माण सक्ने लक्ष्यअनुसार काम सुरु गरे पनि समयमा नै सम्पन्न नभएका कारण पटकपटक म्याद र लगानी थप गरिँदै आएको छ
हाम्रा कुरा
प्रकाशित २०८२ मंसिर ४ बिहिबार
896
Shares
काठमाडौँ। सभामुख देवराज घिमिरेले सिंहदरबारभित्र निर्माणाधीन सङ्घीय संसद भवनलाई समयमै सम्पन्न गर्न निर्देशन दिएका छन्।
बिहीवार राष्ट्रिय सभाअध्यक्षसहित निर्माणाधीन भवन निरीक्षणमा पुगेका सभामुख घिमिरेले निर्माण कार्यको गति थप बढाउन समेत निर्माण कम्पनीलाई निर्देशन दिए। उनले निर्माण कम्पनीले हाल ३५० जनाको श्रमशक्ति प्रयोग भइरहेको जानकारी दिएको उल्लेख गर्दै सोहीअनुसार आगामी चैत १५ सम्म निर्माण सम्पन्न गर्नेगरी अगाडि बढ्नुपर्नेमा जोड दिए।
निरीक्षणपछि सञ्चारकर्मीसँग कुरा गर्दै उनले भने, “निर्माणाधीन संसद भवन निर्माणको कार्यले केही गति लिएको जस्तो देखिन्छ। राष्ट्रिय सभा अहिले पनि जारी छ। त्यसको हल छैन। राष्ट्रिय सभा यो भवनमा तत्काल चलाउनको लागि सम्भव देखिएन। त्यसको लागि अरु नै विकल्प खोज्नुपर्ने आवश्यकता छ। प्रतिनिधि सभा सञ्चालनको लागि चैतको अन्तिमसम्ममा तयारी गर्नेगरी जानुपर्छ। त्यसरी गयो भने सकिन्छ भन्ने देखिन्छ।” उनले निर्माणको गति सन्तोषजनक नभए पनि 'स्पीड लिएको हुनाले आशा राख्ने ठाउँ रहेको' बताए।
निर्माणाधीन उक्त भवनको २०७६ असोज १ गते तत्कालीन प्रधानमन्त्री केपी शर्मा ओलीले शिलान्यास गरेका थिए। तीन वर्षमा निर्माण सक्ने लक्ष्यअनुसार काम सुरु गरे पनि समयमा नै सम्पन्न नभएका कारण पटकपटक म्याद र लगानी थप गरिँदै आएको छ। १५१ रोपनी जग्गामा सङ्घीय संसद्का १२ वटा भवन निर्माण हुँदैछन्।
